Hvolfdi við strendur Túnis

Hið minnsta 48 flóttamenn létu lífið þegar bátnum þeirra hvolfdi við austurströnd Túnis. Strandgæslum Miðjarðarhafsríkja tókst að bjarga 67 á lífi úr sjónum.

Túnis er orðinn einn helsti viðkomustaður flóttamanna áður en þeir halda för sinni áfram yfir til Evrópu. Breska ríkisútvarpið segir að það megi rekja til aðgerða gegn smyglurum í nágrannaríkinu Líbýu, sem hafa drepið, pyntað og hneppt flóttamenn í þrældóm.

Smyglararnir hafi því í auknum mæli fært starfsemi sína yfir landamærin. Þá sé siglingin jafnframt styttri til Ítalíu frá Túnis en frá Líbýu.

Talið er að um 180 manns hafi verið í bátnum sem hvolfdi um helgina, þar af voru 100 farþegar frá Túnis. Björgunaraðgerðir voru stöðvaðar í gærkvöldi en innanríkisráðherra Túnis segir að þeim verði framhaldið í birtingu.

Í samtali við Reuters sagði einn sjónarvottur að skipstjóri bátsins hafi stungið af skömmu eftir að síga fór á ógæfuhliðina. Ætla má að hann hafi verið að flýja laganna verði.