Lögreglumenn lúskruðu á óvopnuðum manni

Lögreglan í Mesa-borg í Arizona birti í gær myndband úr öryggismyndavél þar sem sjá má lögreglumenn ganga í skrokk á óvopnuðum manni.

Barsmíðarnar áttu sér stað þann 23. maí síðastliðinn. Í myndbandinu, sem sjá má hér að neðan, sést hvernig fjórir lögreglumenn veitast að manninum. Einn þeirra rekur hné í maga hans, skellir höfði mannsins í lyftuhurð á meðan annar slær hann þéttingsfast í höfuðið.

Lögreglan hafði verið send að íbúðarblokk þar sem þau rákust á manninn, sem nafngreindur hefur verið sem Robert Johnson. Lögreglumenninir skipuðu honum að setjast niður á meðan þeir ræddu við hann. Johnson byrjar þá að tala í farsíma og skömmu síðar hefjast barsmíðarnar.

Lögreglumennirnir segja að Johnson hafi ekki hlýtt fyrirmælum þeirra og verið ógnandi í samskiptum. Hann hefur nú verið kærður fyrir að brjóta gegn valdstjórninni og hindra framgang réttvísinnar. Í frétt VOX um málið segir hins vegar að ekki liggi fyrir hvað Johnson á að hafa hindrað.

Lögreglustjórinn í Mesa sagði í samtali við fjölmiðla að embættið hafi viljað gera myndbandið opinbert til að varpa ljósi á málið. Hann segist telja að lögreglumenn sínir hafi ekki verið upp á sitt besta og að honum þyki miður að málið hafi þróast með þessum hætti.

Fjórir lögreglumenn sem sjást í myndbandinu hafa verið sendir í leyfi frá störfum meðan atvikið er til rannsóknar. Lögreglan gerir ráð fyrir því að opinbera fleiri myndbönd af handtökunni á næstu dögum.

Barsmíðarnar hefjast þegar þrjár mínútur eru liðnar af myndbandinu.