Sex manna fjölskylda talin bera ábyrgð á árásum í Indónesíu

Meðlimir einnar fjölskyldu eru talin bera ábyrgð á þremur sjálfsmorðssprengingum í borginni Surabaya í Indónesíu. BBC greinir frá.

Í það minnsta þrettán eru látnir eftir árásirnar sem framdar voru í þremur kirkjum í borginni snemma í morgun á staðartíma.

Móðir sprengdi sig og tvær dætur sínar í loft upp í einni kirkjunni á meðan fjölskyldufaðirinn og tveir synir þeirra frömdu árásirnar í hinum kirkjunum. Stúlkurnar tvær voru níu og tólf ára og synir hjónanna voru sextán og átján ára. Synirnir eru sagðir hafa keyrt bifhjólum inn í kaþólsku kirkjuna Santa María og sprengt sprengjur sem þeir báru á sér. 

Samtökin sem kenna sig við íslamska ríkið hafa lýst yfir ábyrgð á árásunum sem eru þær mannskæðustu í Indónesíu frá árinu 2005.