Ákærður fyrir að reyna kúga fé af Kevin Hart með myndbandi

Karlmaður hefur verið ákærður fyrir að reyna kúga fé af grínistanum Kevin Hart með myndbandi sem tekið var upp á laun.

Héraðssaksóknari í Los Angeles-sýslu í Bandaríkjunum hefur gefið út ákæru á hendur manninum sem er hinn fjörutíu og eins árs gamli Jonathan Todd Jackson.

Samkvæmt ákærunni sendi Jackson grínistanum bréf í ágúst í fyrra þar sem hann sagðist eiga myndband af honum með konu í Las Vegas. Hótaði hann því að selja myndbandið til slúðurmiðla í Bandaríkjunum ef Kevin Hart myndi ekki borga honum. Ekki er vitað hve mikið maður fór fram á.

Verði hann fundinn sekur á hann yfir höfði sér fjögurra ára fangelsisvist.

Kevin Hart sendi frá sér afsökunarbeiðni til barnshafandi eiginkonu sinnar og tveggja barna í september í fyrra eftir að myndskeiðum af honum og annarri konu var lekið á netið.