Golfhringur vina endaði með hnífstungu

Ástrali á miðjum aldri hefði betur sleppt því að fara í golf með tveimur vinum sínum eftir að þeir voru búnir að fá sér nokkra gráa.

Hann var nefnilega orðinn of ölvaður og endaði golfhringinn með því að ráðast á vini sína.

Hinir tveir voru að kvarta yfir hegðun hans á vellinum er hann labbaði út í golfbíl, náði í hníf og réðst á vini sína. Hvað hann var að gera með hníf í bílnum veit enginn. Hann stakk annan vininn í lærið og hitti beint í slagæð. Sá missti mikið blóð og þurfti að vera fluttur á spítala með þyrlu.

„Hann var búinn að missa þrjá lítra af blóði og var aðeins mínútum frá því að deyja,“ sagði dómarinn er málið var tekið fyrir.

Dómarinn sýndi vininum með hnífinn enga miskunn og dæmdi hann í 20 mánaða fangelsi. Sá er hann stakk hafði verið besti vinur hans í 25 ára en engum sögum fer af því hvort þeir séu enn vinir.