Jarðskjálftahrinan úti fyrir Grímsey virðist vera í rénun. Íbúar í eynni eru þó við öllu búnir enda þekkt að stærri skjálftar geti orðið á þessu svæði.

Skjálftarnir síðasta sólarhringinn hafa verið mun færri en sólarhringinn þar á undan. Þannig varð stærsti skjálftinn í dag um klukkan þrjú í nótt en hann var þrír að stærð, samanborið við stóra skjálftann í gærmorgun.

Húsavík stendur á Tjörnesbrotabeltinu þar sem orðið hafa stórir jarðskjálftar, engu minni en á Suðurlandi í Suðurlandsskjálfta. Sérfræðingar hafa sagt að á síðustu árum og áratugum hafi vaxið það mikil spenna í jarðskorpunni að skjálfti að stærðinni sjö sé jafnvel talinn líklegur.

Skjálftahrinur sem þessi fá því íbúa á svæðinu og nærsveitum til að líta sér nær ef stór skjálfti ríður yfir og þá er gott að reyna vera undirbúin. Lengi hefur verið spáð að stór skjálfti muni verða á Húsavík en síðustu daga hefur fólk dustað rykið af viðbragðsáætlunum.

Allir rólegir og engin hræðsla

Það eru þó allir rólegir í sveitarfélaginu og engin hræðsla. Íbúar eru meðvitaðir um að þeir búi á skjálftasvæði og eru vanir hreyfingum í jarðskorpunni.

Sveitarstjórinn segir íbúa fylgjast vel með gangi mála í skjálftahrinunni við Grímsey. Síðast varð sambærileg jarðskjálftahrina úti fyrir norðurlandi 2012/2013 og í kjölfar hennar hafi verið haldin alþjóðleg jarðskjálftaráðstefna á Húsavík.

„Þannig að ég held að það sé svona aðeins meira rennerí í að kaupa festingar og annað og fólk svona hugar að því að minnka áhættuna á því að það hrynji eitthvað yfir það heima hjá sér. Svo höfum við líka tekið við okkur hér varðandi skólana og okkar stofnanir, yfirfara það og rifja upp viðbrögð við jarðskjálfta ef hann skyldi koma,“ segir Kristján Þór Magnússon, sveitarstjóri Norðurþings.

Getur tekið langan tíma að mynda jafn mikla spennu og var í Kröflueldum

Í hartnær fjóra áratugi vann Eysteinn Tryggvason við jarðeðlisrannsóknir meðal annars hjá Veðurstofu Íslands. Hans mat er að lítl hætta sé a stórum skjálftum við Húsavík í að minnsta kosti í bili.

„Þá er ég aðallega að hugsa um það að spennuleysing í Kröflueldum var svo mikil að það tekur langan tíma, kannski aldir, að það verði eins mikil spenna eins og þá var,“ segir Eysteinn.

Eystinn segir þó að að Húsavík sé á hættulegum stað hvað jarðskjálfta varðar. Til að myndar er nýtt kísilver PCC á Bakka, sem tekið verður í notkun á næstu vikum, í um 500 metra fjarlægð norður frá einni sprungunni.

„Þessi verksmiðja er náttúrulega hönnuð miðað við það að hér geti orðið jarðskjálfti og fylgt öllum ströngustu stöðlum um mögulega jarðskjálfta. Ég get allavega fullyrt að þessi verksmiðja er mjög vel byggð og sterk og á að þola það sem getur gerst hér,“ segir Jökull Gunnarsson, framkvæmdastjóri framleiðslus PCC á Bakka.

Aðspurður hvort hann hafi áhyggjur af því að stór skjálfti verði undir Húsavík segir Eysteinn:

„Ég hef engar áhyggjur af því. Ég veit að það verður.“

Sveitarstjórinn segir að þessi möguleiki hafi verið til umræðu í fjölda ára.

„Að það sé kominn tími á stærri atburð en það getur enginn sagt til um það hvenær eða hvort nákvæmlega eða hvar á brotabeltinu það gerist.“