Mistök sem varða börn og ofbeldi óafsakanleg

Yfirvöld þurfa að tryggja að börn í veikri félagslegri stöðu séu varin fyrir því að kynferðisbrotamenn sækist eftir að vera nærri þeim. Þetta sagði Rósa Björk Brynjólfsdóttir, þinkona VG á Alþingi á dag. Hún sagði mistök sem varða börn og ofbeldi óafsakanleg.

Mál starfsmanns Barnverndar Reykjavíkur sem hefur verið kærður fyrir kynferðisbrot í garð barna í starfi hefur vakið mikla athygli. Maðurinn hélt áfram að starfa fyrir Barnavernd í nokkra mánuði eftir að hann var ákærður vegna þess að lögregla lét ekki vita af ákærunni.

Þá var hann kærður fyrir kynferðisbrot gegn börnum árið 2013 en fékk áfram að starfa hjá barnaverndaryfirvöldum.

„Lögreglustjóri höfuðborgarsvæðisins hefur harmað mistök lögreglu. Við getum öll gert mistök en í málum er varða börn og ofbeldi gegn þeim verða þau mistök því miður oft óafsakanleg,“ sagði Rósa Björk þegar hún gerði málið að umræðuefni við upphaf þingfundar í dag.

Svo virtist sem í báðum tilvikum hafi lögreglunni láðst að tilkynna Barnavernd Reykjavíkur að starfsmaður hjá þeim hafi verið kærður fyrir svo alvarlegt brot og að kærurnar hafi ekki með neinu móti komið fram í ráðningaferli mannsins innan Barnaverndar.

Kærur endi ekki í þykkum stafla á skrifborði

Sagði þingkonan mál starfsmannsins enn eina birtingarmynd þess að samfélagið tryggði ekki börnum, berskjölduðustu þegnum samfélagsins vernd fyrir kynferðisbrotamönnum sem sækist eftir að vera innan um börn í veikri félagslegri stöðu.

„Þetta þarf að laga strax, ekki með neinum starfshópum heldur aðgerðum. Ef það er eitthvað sem þarf að laga í lagabókstafnum sem lýtur að því að útvíkka enn frekar heimildir til að opna sakaskrár þegar fólk er ráði til starfa með börnum þarf að laga það. Ef það er eitthvað sem þarf að laga í að minnka álag á lögreglufólk með því að auka loks fjármuni til lögreglunnar skulum við gera það,“ sagði Rósa Björk.

Hvatti hún félags- og jafnréttismálaráðherra til að tryggja í samráði við barnaverndaryfirvöld að börn í umsjón barnaverndaryfirvalda séu ekki innan um kærða kynferðisbrotamenn og dómsmálaráðherra til að tryggja lögreglu nægilegt fé til að auka mannafla.

Árni Þór Sigmundsson, yfirmaður kynferðisbrotadeildar lögreglunnar á höfuðborgarsvæðinu, visaði meðal annars til mikils fjölda mála þegar hann svaraði spurningum um hvers vegna Barnavernd hefði ekki verið tilkynnt um kæru á hendur manninum í ágúst.

„Lögreglan á ekki að vera svo fjárþurfi og mannaflsþurfi að kærur um kynferðisofbeldi gegn börnum endi í þykkum málastafla á skrifstofuborðinu,“ sagði Rósa Björk.