Dauða O'Riordan bar ekki að með saknæmum hætti

Lögregla í London segir að dauða írsku söngkonunnar Dolores O'Riordan hafi ekki borið að með saknæmum hætti. Krufning muni leiða í ljós hvað hafi dregið söngkonuna til dauða.

O'Riordan var söngkona írsku sveitarinnar The Cranberries sem naut mikilla vinsælda á tíunda áratugnum, meðal annars með lögunum Linger, Zombie, Salvation og Dreams.

Hin 46 ára O'Riordan fannst látin á hótelherbergi sínu í London í gærmorgun, en sveitin var í London til að taka upp í stúdíói.

Aðrir meðlimir Cranberries – Noel Hogan, Fergal Lawler og Mike Hogan – minntust vinkonu sinnar á samfélagsmiðlum í gær og sögðu hana hafa búið yfir einstökum hæfileikum. Sögðust þeir hafa notið forréttinda að hafa verið hluta af lífi hennar frá árinu 1989.

We are devastated on the passing of our friend Dolores. She was an extraordinary talent and we feel very privileged to have been part of her life from 1989 when we started the Cranberries. The world has lost a true artist today.
Noel, Mike and Fergal

— The Cranberries (@The_Cranberries) January 15, 2018