Fjölskylda úr eldsvoða í húsaskjól hjá verktaka

Verktakafyrirtæki í Mosfellsbæ hefur skotið skjólshúsi yfir fjölskylduna sem missti allt sitt þegar timburhús hennar, Reykjabraut í Mosfellsbæ, brann til kaldra kola aðfaranótt þriðjudags.

Fjölskyldan hefur búið á gistiheimili frá því hún voru útskrifuð af sjúkrahúsi. Vonir standa til að þau geti flutt strax í dag í einbýlishús sem verktakafyrirtækið lánar fjölskyldunni tímabundið á meðan leitað er að varanlegu húsnæði fyrir hana. Þetta staðfestir Nanna Vilhelmsdóttir, nágranni þeirra, sem hóf söfnun á nauðsynjum fyrir fjölskylduna, í samstarfi við Rauða krossinn í Mosfellsbæ.

„Söfnunin hefur gengið framar vonum,“ segir Nanna en hún var í húsi Rauða krossins í Þverholti í gær og tók á móti gjöfum til fjölskyldunnar.

„Núna þurfum við að heyra aftur í því fólki sem var að bjóða húsbúnað og húsgögn en ég afþakkaði allt slíkt í gær,“ segir Nanna og segist ekki hafa þorað að taka við húsgögnum og húsbúnaði enda ekki legið fyrir hve fljótt húsnæðisvandi fjölskyldunnar leystist. Hún lýsir ánægju með að húsnæði hafi fundist jafn fljótt og raun ber vitni.

Nanna segir að börnin hafi þegar fengið vilyrði fyrir kojum en hjónin vanti rúm og elsta soninn sem er um tvítugt vanti einnig rúm. „Svo vantar auðvitað bara allt til heimilishaldsins. Það er búið að bjóða potta- og hnífasett en þau eru auðvitað allslaus að mestu.“

Nanna segir að börnin séu orðin býsna vel útbúin í bili með fatnað og þess háttar en enn þá vanti mjög föt á karlmennina.

Þá hefur fjölskyldan einnig fengið framlög í formi gjafakorta og inneigna í matvöruverslunum og Nanna segir þessar gjafir nýtast afar vel. Aðspurð segir hún slíkar gjafir allar vera frá einstaklingum. En þó eru líka fyrirtæki að láta af hendi rakna. Þannig fái fjölskyldan bæði síma og spjaldtölvur frá fyrirtækjum.

Nanna verður í húsi Rauða krossins eftir hádegi í dag og tekur á móti framlögum og gjöfum til fjölskyldunnar.

Hjónin sjálf eru yfir sig þakklát fyrir allan stuðninginn. Að sögn fjölskylduvinar sem Fréttablaðið ræddi við vilja þau koma á framfæri þakklæti til allra sem hafa stutt þau og ekki síst mikinn andlegan stuðning sem þau hafa fengið frá foreldrum, vinum og vandamönnum.