Einn látinn eftir umferðarslys við Vík

Einn er látinn eftir umferðarslys á þjóðvegi 1 skammt austan við Vík í Mýrdal við svokallaðn Kötlugarð. Slysið varð laust eftir klukkan 20 í gærkvöldi. Þetta kemur fram í tilkynningu frá lögreglunni á Suðurlandi.

Þrír voru í bifreiðinni sem fór nokkrar veltur og var ökumaður bifreiðarinnar fluttur með þyrlu Landhelgisgæslunnar á slysadeild, en var úrskurðaður látinn í nótt. Tveir farþegar voru í bifreiðinni sem slösuðust minna, en voru fluttir með sjúkrabifreiðum á slysadeild í Reykjavík.

Svo virðist sem allir hafi verið í öryggisbelti þegar slysið varð.

Tildrög slyssins eru ókunn og eru til rannsóknar hjá lögreglunni á Suðurlandi, ásamt tæknideild lögreglunnar á höfuðborgarsvæðinu sem einnig kom á vettvang.

Mikill viðbúnaður var á vettvangi vegna slyssins frá lögreglu, slökkviliði í Vík, sjúkraflutningum á Suðurlandi og Landhelgisgæslunni.

Það sem af er ári hafa 4 einstaklingar látið lífið í þremur umferðarslysum í umdæmi lögreglunnar á Suðurlandi, að því er segir í tilkynningu frá lögreglunni.

Fréttin hefur verið uppfærð.