Öll rafræn þjónusta ríkis og sveitarfélaga á einum stað

Á fimmtudag verður opnuð ný útgáfa pósthólfs inni á Ísland.is þar sem einstaklingar og fyrirtæki geta nálgast allar mikilvægar upplýsingar um samskipti sín við stofnanir ríkisins og sveitarfélög. Bjarni Benediktsson fjármála- og efnahagsráðherra segir að markmiðið sé að árið 2020 verði stafræna þjónusta megin samskiptaleið hins opinbera við almenning. Þá verða í vikunni teknir í gagnið nýir rafrænir álagningarseðlar hjá ríkisskattstjóra sem veita ítarlegri og betri upplýsingar um skattgreiðslur en áður hafa verið veittar.

Bjarni Benediktsson kynnti í morgun bætta rafræna þjónustu hins opinbera við borgarann á vefnum Ísland.is. Með breytingunum verður þjónustuleiðum gegnum rafræn samskipti fjölgað og markmiðið er að fyrir árið 2020 verði öll samskipti borgarans við ráðuneyti, stofnanir ríkisins og sveitarfélög á einum stað í sérstöku pósthólfi inni á Ísland.is sem verður aðgengilegt með rafrænum skilríkjum. Nýja pósthólfið verður formlega tekið í notkun á fimmtudag og verður þjónustan sem verður aðgengileg þar inni svo efld jafnóðum. 

„Hugmyndin er sú að þarna inni geti menn rekið öll sín erindi gagnvart hinu opinbera, ríkinu og eftir atvikum sveitarfélögum og tekið þar við tilkynningum. Við erum að kynna þetta nýja rafræna pósthólf inni á Ísland.is og þar munu menn geta nálgast álagningarseðla en við getum nefnt fleiri dæmi. Menn munu geta verið þar í samskiptum til að tryggja leikskólapláss fyrir börnin sín, við heilsugæslu vegna lyfseðils sem hefur verið endurnýjaður, nálgast leyfisumsóknir og svo framvegis. Allt á að vera hægt að reka í gegnum þetta eina pósthólf á einum stað, öll erindi við hið opinbera. Við höfum sett okkur það markmið að fyrir árið 2020 verði stafræn samskipti megin samskiptaleið borgarans við hið opinbera,“ segir Bjarni Benediktsson fjármála- og efnahagsráðherra.

Nýir stafrænir álagningarseðlar

Samhliða þessu var nýtt útlit og aðgengi að álagningarseðlum kynnt. Þessir nýju álagningarseðlar eru stafrænir og gagnvirkir og veita mun betri yfirsýn og upplýsingar um opinbera álagningu en skattgreiðendur hafa átt kost á hingað til. 

Ingvar J. Rögnvaldsson, settur ríkisskattstjóri, segir að þessir rafrænu álagningarseðlar bæti ekki aðeins þjónustuna heldur dragi úr álagi á embætti ríkisskattstjóra. 

„Þetta myndræna form lýsir miklu betur og gefur betri upplýsingar en við gætum veitt gegnum síma eða jafnvel þótt fólk kæmi til okkar. Þetta rafræna form býður upp á miklu meiri möguleika til þess að koma á framfæri upplýsingum. Ef þetta væri ekki á þessu rafræna formi þyrfti kannski að senda 15-20 síðna bækling til hvers og eins. Sem allir sjá fyrir sér að enginn hefði þolinmæði til að kafa í gegnum,“ segir Ingvar.