Eltihrellir Söndru Bullock látinn

Karlmaður, sem dæmdur var á síðasta ári fyrir að sitja um leikkonuna Söndru Bullock, lést eftir lögregluaðgerð við heimili hans í gær. Talið er að hann hafi svipt sig lífi.

Á vef People kemur fram að lögreglan í Los Angeles vilji lítið tjá sig um málið að svo stöddu. Heimildarmenn blaðsins segja þó að lögreglan hafi verið send að heimili Joshua James Corbett í gærmorgun vegna gruns um að maðurinn hafi rofið nálgunarbann.

Þegar lögreglan mætti á vettvang er Corbett sagður hafa birgt sig inni og haft í hótunum við lögreglumenn. Því var kallað á sérsveitina sem sat um hús Corbett. Skömmu síðar er maðurinn sagður hafa stytt sér aldur.

Corbett var í maí á síðasta ári dæmdur í fimm ára skilorðsbundið fangelsi fyrir að hafa brotist inn á heimili Söndru Bullock árið 2014 og fyrir að hafa setið um leikkonuna um langt skeið. Hann játaði brot sín og var gert að leita sér geðrænnar aðstoðar.