Hefur greitt um hálfa milljón í kostnað dagforeldris vegna mannekluvanda

Móðir tveggja ára tvíbura hefur greitt um hálfa milljón í kostnað dagforeldris vegna mannekluvanda borgarinnar. Hún segir það mismunun að foreldrum innan sama sveitarfélags sé boðið upp á mismunandi gjaldskrár eftir því hvort að sveitarfélagið nær að þjónusta þá eða ekki.

Leikskólar hafa flestir hafið göngu sína eftir sumarfrí, en enn bíða einhverjir foreldrar eftir því að börn þeirra komist að. Tvíbúramóðirin Steinunn Gyðu ög Guðjónsdóttir er ein þeirra. 

„Við erum með tvíbura sem eru 26 mánaða, þeir urðu tveggja ára í júni. Þeir eru búnir að fá úthlutað  plássi á leikskóla en vegna manneklu þá komast þeir ekki inn. Þeir eru hjá dagmömmu og okkur fannst það eins og lottóvinningur að komast að hjá dagforeldri yfir höfuð. En gjöldin þar eru talsvert hærri en þau gjöld sem við myndum greiða ef þeir væru á leikskóla.“ 

Hún tók saman gjaldliði dagforeldris og leikskóla. En hún greiðir rúmlega 98 þúsund á mánuði fyrir dagforeldri en leikskólagjöld eru um 43 þúsund. Því hefur hún að greitt rúmlega hálfa milljón í kostnað dagforeldris vegna mannekluvanda borgarinnar.

„Fjölskyldan hefði sannarlega geta notað þessa hálfu milljón í ýmislegt gagnlegt. Mér finnst það talsverð mismunun þegar foreldrum innan sama sveitarfélags er boðið upp á mismunandi gjaldskrár eftir því hvort sveitarfélagið nær að þjónusta þá eða ekki. Það er einföld aðgerð sem borgin getur ráðist í í dag að láta alla foreldra borga sömu gjöld frá einhverjum ákveðnum aldri, til dæmis 18 mánaða, þannig við sitjum við sama borð að þessu leyti. Það hlýtur að vera að það þurfi að hækka laun og bæta starfsumhverfi á leikskólanum svo við sitjum ekki uppi með mannekluvanda ár eftir ár,“ segir Steinunn.

Fréttastofa hafði samband við Reykjarvíkurborg í dag vegna málsins en þau svör fengust að verið væri að kanna landslagið og ekki væri unnt að veita upplýsingar né viðtal.

„Maður hefur heyrt af því að í sumum sveitarfélögum komist börnin inn talsvert yngri. Ef ég byggi bara hér úti á Seltjarnarnesi þá væru þeir sennilega komnir inn fyrir löngu síðan. Auðvitað horfir fólk í svona hluti þegar það velur sér búsetu,“ segir Steinunn.