Ólafur hefur ekki óskað formlega eftir fundi

Ólafur Ólafsson hefur ekki óskað formlega eftir fundi með stjórnskipunar- og eftirlitsnefnd vegna skýrslu rannsóknarnefndar Alþingis um einkavæðingu Búnaðarbankans árið 2003. Formleg beiðni þarf að berast svo nefndin taki ósk hans til greina.

Stjórnskipunar- og eftirlitsnefnd hefur ekkert komið saman frá því að Ólafur sendi frá sér fréttatilkynningu í síðustu viku. Jón Steindór Valdimarsson, sem leiðir afgreiðslu á málum tengdum sölu Búnaðarbankans, segist gera ráð fyrir að nefndin muni funda í næstu viku. Þá verði næstu skref væntanlega ákveðin.

„Nefndin hefur ekki komið saman og það hefur ekki borist formlegt erindi frá Ólafi, þó hann hafi haft samband við formann nefndarinnar og óskað eftir því að koma fyrir hana. Við eigum bara eftir að hittast og fara yfir þetta og annað sem þarf að gera í tengslum við þessa skýrslu og reyndar fleiri verkefni sem tengjast þeirri þingsályktun sem lá til grundvallar því að þessi skýrsla var gerð. Við munum fara yfir málin og verklagið og hvort og hvaða gesti við köllum fyrir,“ segir Jón Steindór.

Jón Steindór segist ekki geta svarað til um hvort líklegt þyki að beiðni Ólafs um fund verði samþykkt, né hvort hann verði opinn fjölmiðlum og almenningi.

„Það er ekkert hægt að leggja mat á það. Það fer bara eftir því hvernig menn skipuleggja þetta starf. Það væri auðvitað hægt að kalla fyrir fleiri sem málið varðar en rannsóknarnefndin er búin að ljúka sínum störfum með býsna afdráttarlausri niðurstöðu. Ef við metum það þannig að við teljum líkur á að það komi eitthvað nýtt fram í málinu þá skoðum við það,“ segir hann. Ólafur hafi haft öll tækifæri til þess að tjá sig fyrir rannsóknarnefndinni þegar vinna við skýrsluna var í gangi.

Vill varpa nýju ljósi á atburðarásina

Skýrsla rannsóknarnefndar Alþingis um aðkomu þýska bankans Hauck & Aufhäuser að sölu Búnaðarbankans kom út í síðasta mánuði. Niðurstaða nefndarinnar var sú að stjórnvöld, almenningur og fjölmiðlar hafi verið blekkt þar sem þýski bankinn hafi í raun aldrei verið raunverulegur kaupandi að hlutum í Búnaðarbankanum. Var það jafnframt niðurstaða nefndarinnar að Ólafur Ólafsson hafi stýrt fléttunni um aðkomu Hauck & Aufhäuser frá A til Ö.

Ólafur sendi frá sér fréttatilkynningu í framhaldinu þar sem hann segist borinn þungum sökum og vilja varpa nýju ljósi á atburðarásina. Fór hann því þess á leit við Brynjar Níelsson, formann stjórnskipunar- og eftirlitsnefndar, að fá að sjá sig fyrir nefndinni, en sem fyrr segir þarf formlegt erindi að berast.

Brynjar mun ekki taka þátt í störfum nefndarinnar í þessu máli þar sem hann var verjandi Bjarka Diego þegar sakamál tengd Kaupþingi voru til rannsóknar hjá sérstökum saksóknara.