Ráðherra í starfsstjórn gæti skipað nýjan ferðamálastjóra

Hæfnisnefnd sem skipuð var vegna ráðningar nýs ferðamálastjóra hefur farið yfir umsóknir þeirra 23 sem sóttu um starfið.

Ekki er víst hver verður ráðherra þegar skipað verður í stöðuna en aðstoðarmaður Þórdísar Kolbrúnar Reykfjörð Gylfadóttur, ferðamála,-iðnaðar- og nýsköpunarráðherra í starfsstjórn Sjálfstæðisflokks, Bjartrar framtíðar og Viðreisnar, segir ekki deilt um það að ráðherrar í starfsstjórn geti skipað í embætti.

Að lokinni yfirferð hæfnisnefndarinnar var ákveðið að sex umsækjendur kæmu til greina í starfið. Þeir munu fara í viðtöl þar sem þeir fá tækifæri til að tjá sig um það sem framundan væri í ferðamálum og hvernig viðkomandi sæi fyrir sér að hann myndi takast á við þau verkefni sem framundan eru, eins og segir í skriflegu svari upplýsingafulltrúa atvinnuvega- og nýsköpunarráðuneytisins.

Á meðal þeirra sem sóttu um starf ferðamálastjóra eru Halldór Halldórsson, borgarfulltrúi Sjálfstæðisflokksins, Áshildur Bragadóttir, forstöðumaður Höfuðborgarstofu, Dofri Hermannsson, leikari, og Ólína Þorvarðardóttir, fyrrverandi þingmaður Samfylkingarinnar, en nöfn þeirra sex sem fara í viðtöl eru ekki gefin upp.

 

Gert er ráð fyrir að þessum viðtölum ljúki eftir helgi. Í framhaldinu verður svo unnin skýrsla og er gert ráð fyrir að henni verði skilað til ráðherra í seinni hluta næstu viku.

Hæfnisnefndin er skipuð þeim Guðrúnu Gísladóttur, skrifstofustjóra í atvinnu-og nýsköpunarráðuneytinu, Herði Þórhallssyni, forstjóra Ice Pharma, og Guðnýju Elísabetu Ingadóttur, mannauðsstjóra, sem er formaður nefndarinnar.

Ráðherra ferðamála skipar ferðamálastjóra til fimm ára. Eins og kunnugt er nú starfsstjórn í landinu sem hefur ekki meirihluta Alþingis á bak við sig. Vísir grennslaðist því fyrir um hvort að Þórdís Kolbrún hygðist skipa í embættið sem ráðherra í starfsstjórn eða hvort beðið verði með skipunina þar til ný ríkisstjórn hefur tekið við völdum.

Samkvæmt upplýsingum frá Ólafi Teiti Guðnasyni, aðstoðarmanni ráðherra, verður ráðningarferlinu hvorki flýtt né seinkað vegna stjórnarskiptanna. Þá bendir hann jafnframt á að ekki sé deilt um það að ráðherrar í starfsstjórn geta skipað í embætti á vegum hins opinbera.