39 drepnir í aðgerðum pakistanskra yfirvalda

39 manns féllu í aðgerðum pakistanskra öryggisyfirvalda víðs vegar um landið í gær og í nótt í kjölfar sjálfsvígssprengjuárásar við bænahús Súfista í bænum Sehwan í gær. Áttatíu manns fórust í árásinni og um 250 særðust.

Í frétt AP segir að 47 manns hafi jafnframt verið handteknir í aðgerðum lögreglu.

Fjölmargir voru drepnir í aðgerðum í Sindh-héraði þar sem árásin átti sér stað og þá féllu margir til viðbótar í aðgerðum í norðvesturhluta landsins,

Hryðjuverkasamtökin ISIS hafa lýst yfir ábyrgð á árásinni, en árásum samtakanna í Pakistan hefur fjölgað mikið á síðustu mánuðum.

Útfarir fórnarlamba árásarinnar fara fram í dag.

Nawaz Sharif, forsætisráðherra Pakistans, fordæmdi árásina í gær og hét því að hafa uppi á þeim sem ábyrgð bæru á henni.