„Tilkynning Icelandair var rýr og gaf markaðnum enga hjálp“

Hagfræðideild Landsbankans lækkaði í gær verðmat sitt á Icelandair í kjölfar svartrar afkomuviðvörunar flugfélagsins. Matið stendur nú í 18 krónum á hlut en var fyrir skeyti fyrirtækisins til Kauphallar Íslands í 33,9 krónum á hlut. IFS greining, þjónustu- og ráðgjafarfyrirtæki á sviði greininga og fjármála, mat bréfin á genginu 20,7 krónur í gær, samanborið við 28,9 í síðustu spá fyrirtækisins, eða nærri 30 prósentum hærra en þau standa í nú skömmu eftir opnun markaða.

Þetta kemur fram í uppfærðu verðmati fyrirtækjanna tveggja sem þau sendu viðskiptavinum sínum eftir lokun markaða í gær og Vísir hefur undir höndum. Hagfræðideild Landsbankans ráðleggur fjárfestum að halda í bréf sín í flugfélaginu en IFS að þeir kaupi. Í pósti Landsbankans er bent á að í síðustu afkomuspá hagfræðideildarinnar fyrir Icelandair var gert ráð fyrir að EBITDA fyrirtækisins, hagnaður fyrir fjármagnsliði, afskriftir og skatta, á árinu 2017 yrði 208,7 milljónir Bandaríkjadala. Líkt og kom fram í tilkynningu flugfélagsins í gær er útlit fyrir að hún verði aftur á móti á bilinu 140 til 150 milljónir dala. Bendir deildin á að líklegt sé að bókunarstaða fyrirtækisins hafi versnað á skömmum tíma þrátt fyrir að spá Isavia fyrir 2017 sé jákvæð og óbreytt og hótel virðast „ætla að vera stútfull á árinu“.

„Lýst hefur verið áhyggjum af ferðalögum Evrópubúa til Bandaríkjanna. Breyttar horfur eru sambland af mörgu, en tilkynning félagsins var rýr og gaf markaðnum enga hjálp. Í tilkynningunni kom fram að félagið hafi þegar gripið til aðgerða sem eiga að skila hagræðingu og auknum tekjum. Ekki kemur hinsvegar fram í hverju þessar aðgerðir eru fólgnar og hvert umfang þeirra er. Vonandi verður farið djúpt í þau mál við uppgjör félagsins þann 7. febrúar,“ segja greinendur Landsbankans.   

Hagfræðideildin bendir einnig á að Icelandair er ekki eina flugfélagið sem líður fyrir lægri fargjöld. Aftur á móti bendi allt til þess að fyrirtækið sé að selja lággjaldafargjöld með kostnaðarstrúktur hefðbundins (e. full service) flugfélags.   

„Félagið talar um aðgerðir og verður fróðlegt að vita í hverju þær munu felast, en breytingar á töskugjöldum og heimildum munu duga skammt. Önnur hefðbundin félög hafa verið að tilkynna breytingar að undanförnu, nú síðast í gær þegar SAS tilkynnti að félagið hyggist opna bækistöðvar á Írlandi til að bregðast við harðnandi samkeppni lággjaldaflugfélaga.“

Að mati hagfræðideildarinnar ættu fyrirhuguð kaup Icelandair á nýjum vélum ekki að hafa áhrif að öðru leyti en að stjórnendur fyrirtækisins óski þess nú að vélarnar kæmu fyrr. Ljóst sé að sparneytnar vélar skipti miklu máli í núverandi árferði og verðmat Landsbankans geri ráð fyrir vélarnar komi á áætluðum tíma.

„Áhættan niður við liggur ekki að okkar mati í versnandi ytri þáttum, heldur frekar getu félagsins til að halda niðri kostnaði og aðlaga viðskiptamódelið og flugleiðir að breyttum aðstæðum á markaði,“ segir Hagfræðideildin.