Þétt umferð en engar tafir á leið til borgarinnar

Umferð á leið til höfuðborgarinnar er þétt nú í lok verslunarmannahelgarinnar en engin óhöpp eða slys hafa valdið töfum, að sögn lögreglu.

Aukinn þungi hefur færst í umferðina eftir hádegið, að sögn Hannesar Þórs Guðmundssonar, varðstjóra í umferðardeild lögreglunnar á höfuðborgarsvæðinu.

„Hún er mjög þétt en þetta gengur. Það eru engar tafir eða neitt en hún er orðin þétt bæði á Vestur- og Suðurlandsvegi,“ segir hann.

Engin slys eða óhöpp hafa orðið í umdæmi lögreglunnar á höfuðborgarsvæðinu.

Sömu sögu er að segja á Suðurlandi þar sem umferð hefur aukist nú síðdegis. Að sögn lögreglunnar þar er þung umferð um Suðurlandsveg í vesturátt og á öðrum stofnleiðum frá uppsveitum Árnessýslu.