Ekki nóg fyrir íslensk lið að semja við HM-fara á heimleið til að fá allan gullpottinn

Eins og kom fram í morgun þrefaldast greiðslur FIFA til félagsliða fyrir HM 2018 þegar kemur að leikmönnum sem taka þátt í mótinu.

Samtök evrópskra knattspyrnufélaga, ECA, eru búin að standa lengi í viðræðum við Alþjóðaknattspyrnusambandið, FIFA, og voru niðurstöðurnar birtar í gær.

FIFA greiðir 893.000 íslenskar krónur á dag fyrir hvern leikmann frá og með 1. júní en þá eiga leikmenn að vera lausir frá félagsiðum sínum til að undirbúa sig fyrir HM. Greiðslurnar stöðvast þegar að viðkomandi landslið fellur úr keppni.

Fari svo að íslenskt félagslið eigi leikmann í lokahópi HM 2018 fær það aldrei minna en 23,2 milljónir í sinn hlut frá FIFA sé reiknað með því að strákarnir okkar komist ekki upp úr riðlakeppninni en síðasti leikur D-riðils fer fram 26. júní.

Gætu komið heim

Þetta á þó aðeins við um leikmenn sem spiluðu með sama félaginu á síðustu leiktíð á Íslandi og það mun gera næsta sumar því greiðslur FIFA dreifast á þau félög sem viðkomandi leikmaður spilaði með tvö leiktímabil á undan heimsmeistaramótinu.

Það þykir ansi ólíklegt að leikmenn sem spiluðu í Pepsi-deildinni á síðustu leiktíð og verða þar næsta sumar komist í lokahópinn en orðrómar hafa verið á kreiki um að atvinnumenn séu á heimleið fyrir næstu leiktíð í Pepsi-deildinni. Atvinnumenn sem hafa átt sæti í íslenska landsliðshópnum.

Birkir Már Sævarsson er til dæmis án félags eftir að semja ekki aftur við Hammarby í Svíþjóð en Íslandsmeistarar Vals vilja ólmir fá hann heim. Gott er að taka bara Birki Má sem dæmi til að útskýra greiðslurnar.

Birkir gæti tæplega samið við Val í janúar og verið í raun á undirbúningstímabili fram í maí og mögulega ekki verið búinn að spila keppnisleik áður en Heimir Hallgrímsson velur HM-hópinn. Hann sagði við Morgunblaðið á dögunum að hann vill komast til liðs utan Norðurlanda þar sem hann getur spilað frá janúar og fram á vor.

Skiptist milli tveggja

Verði það raunin fær Hammarby 1/3 af FIFA-greiðslum vegna Birkis vegna þess að hann spilaði þar frá júní 2016 til júlí 2017. Það gera ríflega 7,7 milljónir íslenskra króna, ef enn er miðað við að strákarnir okkar komist ekki upp úr riðli.

Þar sem að sænska deildin er sumardeild bætist svo við næsti gluggi sem skilar einnig 1/3 af greiðslunum.

Birkir Már var þó ekki allan glugga tvö (júní 2017-maí 2018) hjá Hammarby heldur er hann samningsbundinn út desember. Hammarby fær því helminginn, eða 2/4, af þriðjungi greiðslnanna fyrir júlí til desember 2017 sem gera rétt tæpar fjórar milljónir króna. Hammarby á því von á um 11,5 milljónum íslenskra króna verði Birkir Már í HM-hópi Íslands.

En þá er komið að þætti íslenska liðsins og er endurtekið að hér er aðeins um dæmi að ræða. Það sama á við um alla aðra íslenska atvinnumenn sem gætu komið heim á næsta ári og verið samningsbundnir íslensku félagi fyrir 1. júní þegar HM-greiðslurnar hefjast.

Gætu fengið tíu milljónir

Taki Birkir Már sénsinn og semji við Val í janúar fá Valsmenn hinn helminginn á móti Hammarby af þriðjungnum sem í boði er í glugga tvö eða 3,8 milljónir króna. Valsmenn myndu svo fá allan þriðjunginn fyrir að vera með Birki samningsbundinn frá júní eða 7,3 milljónir króna.

Ef Birkir myndi semja við Val í apríl myndi Hlíðarendafélagið fá 1/4 af þriðjungnum í glugga tvö eða 1,9 milljónir króna og því í heildina 9,6 milljónir króna en félag sem Birkir spilar mögulega með frá janúar til mars fengi síðasta fjórðunginn úr glugga tvö.

Greiðslur FIFA til félagsliða:

Gluggi eitt:

1/4 Júlí 2016 - september 2017

1/4 Október 2016 - desember 2016

1/4 Janúar 2017 - mars 2017

1/4 Apríl 2017 - júní 2017

1/3 af heildargreiðslum miðað við riðlakeppni Íslands 7,7 milljónir króna

Gluggi tvö:

1/4 Júlí 2017 - september 2017

1/4 Október 2017 - desember 2018

1/4 Janúar 2018 - mars 2018

1/4 Apríl 2018 - maí 2018

1/3 af heildargreiðslum miðað við riðlakeppni Íslands 7,7 milljónir króna

Gluggi þrjú:

Júní 2018 - júlí 2018

1/3 af heildargreiðslum miðað við riðlakeppni Íslands 7,7 milljónir króna

Samtals 23,2 milljónir króna.

Fréttin er unnin upp úr gögnum frá ECA með aðstoð ÍTF.