Sumarspá Siggu Kling - Meyjan: Átt það til að leita langt yfir skammt

Elsku Meyjan mín, það er búin að vera mikil og há tíðni hjá þér og þú þolir illa að bíða. Þér finnst eins og hlutirnir hafi ekki gengið upp eins og þú vildir. Ég minni þig á að það er bara smá seinkun á fegurðinni sem þú vissir að væri á leiðinni, hún er að banka upp á. Það er svo oft þannig að lausnirnar á öllu þessu erfiða í lífinu eru beint fyrir framan nefið á manni.

Þú átt það til að leita langt yfir skammt. Og eins og þú getur verið sterk og veist þú átt ekki að láta annað fólk fara í taugarnar á þér, þá býr svo mögnuð tilfinning í þér því í raun og veru hefurðu lítið lóuhjarta.

Fólk skilur þig miklu betur þegar þú ert bara gegnsæ og leyfir öðrum að vita hvernig þér líður. Það fer þér illa að setja upp einhvern front - að vera glaðleg á yfirborðinu á meðan kvíðinn nagar hjartað.

Þú ert svo sannarlega í sterkasta merkinu en hjartað mitt, leyfðu þér að vera svolítið kærulaus og afslöppuð! Og mundu þessa sterku setningu sem þú ættir að segja hvern dag: „ég læt lífið leysa þetta fyrir mig“. Þú skalt svo alveg sleppa því að búast við í eina mínútu að aðrir muni gleðja daginn þinn.

Allt það litla og einfalda er málið fyrir þig á þessu fallega sumri. Þannig að alls ekki skipuleggja neitt allt of mikið því þá kemur stressið. Skiptu út orðinu „stress“ fyrir orðið „spenna“ og segðu: „ég er svo spennt fyrir sumrinu, ég er svo spennt fyrir því sem mun koma til mín, það mun EKKERT stoppa mig!“.

Ef ég ætti að lýsa þér þá ertu hörkudugleg með einstaklega skemmtilegt skap og það eina sem gefur þér sigur er að nota kærleikann. Það er ein svo rosalega góð lína á ensku sem hljómar svona: „Kill it with kindness“ . Farðu með hana og þá finnurðu að byrðarnar sem þú hefur haft á bakinu hverfa. Þetta er dásamlegt sumar sem gefur þér hratt og örugglega það afl sem þú þarft fyrir haustið, því það er tíminn til að gera stórkostlega hluti.

Mottó : „Que sera sera, whatever will be will be....“



Frægar Meyjur: Ragna Lóa Stefánsdóttir íþróttakona, Manuela Ósk fyrirsæta, Björk Eiðsdóttir ritstýra, Andrea fatalistamaður, Claudia Schiffer fyrirsæta, Edda Björgvinsdóttir leikkona, Eva Dögg Sigurgeirsdóttir, ritstjóri og tískugúrú, Herdís Jóhannesdóttir athafnakona, Beyoncé Knowles söngkona, Gylfi Þór Sigurðsson, Eiður Smári Guðjohnsen, Sigrún Ósk Kristjánsdóttir sjónvarpskona, Annie Mist crossfittari, Logi Pedro Stefánsson tónlistarmaður, Selma Ragnars, fatahönnuður Íslands, Lalli Johns góðkunningi lögreglunnar, Sema Erla Serdar, baráttukona, Eydís Ósk hjúkrunarkona.