Forsætisráðherra í krumlum Sádi-Araba

Grunur leikur á að stjórnvöld Sádi-Arabíu haldi Saad Hariri, forsætisráðherra Líbanons, í landi þeirra gegn vilja hans. Tíu dagar eru liðnir frá því að Hariri fór til Sádi-Arabíu en hann hefur ekki komið þaðan aftur.

Fyrir rúmri viku lagði Hariri af stað til Sádi-Arabíu. Daginn eftir að hann lenti þar flutti hann ávarp frá landinu þar sem hann sagði af sér sem forsætisráðherra Líbanons. Ástæðan var sú að hann óttaðist að verða ráðinn af dögum. Forseti Líbanons, Michel Aoun, hefur hins vegar neitað að fallast á afsögn hans nema hann komi heim til Líbanons.

Nánir samstarfsmenn Hariri segja við katarska miðilinn Al-Jazeera að um leið og hann hafi lent í Riyadh, höfuðborg Sádi-Arabíu, hafi hann áttað sig á því að eitthvað var rangt. Engin móttökunefnd hafi beðið hans líkt og venjan er. Sími hans hafi verið gerður upptækur og hann þvingaður til að flytja ávarpið.

Sömu heimildarmenn herma einnig að Sádar hafi lengi lagt á ráðin um að eldri bróði Saads, Bahaa, taki við af bróður sínum. Rætt hafi verið við fjölskyldumeðlimi um að þeir heimsæki Sádi-Arabíu í þeim tilgangi að sverja þeim eldri, Bahaa, hollustu en ekki hefur verið fallist á það.

Hariri mætti í sjónvarpsviðtal í gærkvöld og tilkynnti að hann hygðist snúa heim aftur í vikunni. Hann væri ekki fangi í Sádi-Arabíu.

Talið er að ástæðan fyrir nýliðnum atburðum sé sú að Sádar telji Hariri sýna of mikla linkind gagnvart Hezbollah. Samtökin aðhyllast sjía arm íslam og njóta stuðnings Írana. Sádar eru aftur á móti súnní múslimar og meðal helstu andstæðinga Írana. Hafa þeir lengi reynt allt það sem þeir geta til að veikja samtökin en þau eru í senn stjórnmála- og skæruliðasamtök. Sem stendur eiga þau sæti í ríkisstjórn Saads Hariri.

Aðgerðin hefur ýtt Líbanon aftur í fremstu röð í átökum Írana og Sáda sem nú standa yfir. Hingað til hafa Írak, Sýrland og Jemen verið í brennidepli en í öllum þeim löndum hafa staðið yfir átök þar sem Íranar og Sádar hafa stutt dyggilega við bakið á skoðanabræðrum sínum.