Brynja Dan lét aflita á sér augabrúnirnar fyrir góðan málstað

Brynja Dan Gunnarsdóttir markaðsstjóri er ein þeirra sem tóku áskorun í söfnun sem stendur yfir fyrir UNICEF og þurfti að standa við hana í gær. Brynja Dan (brynjadan) er vinsæll áhrifavaldur og með þúsundi fylgjendur á Snapchat og Instagram. Erna Kristín Stefánsdóttir (ernuland) og Sara Monsour (Saramansour96) ákváðu að gera eitthvað öðruvísi til þess að aðstoða við söfnun í Neyðarsjóð UNICEF.

Neyðarsjóður UNICEF aðstoðar þau 300 þúsund börn sem hafa þurft að flýja til Bangladesh í kjölfar ofbeldisöldu í Mjanmar. Aðstæður barnanna eru mjög erfiðar. Þau eru hrædd, svöng og hafa mörg hver upplifað algjöran hrylling. Þau þurfa tafarlaust á okkar hjálp að halda og vildu því Erna og Sara taka þátt í að veita þessum börnum lífsnauðsynlega hjálp.

Erna og Sara skoruðu á þekkta áhrifavalda til að taka áskorunum fyrir þennan góða málstað. Snapparinn Ingólfur Grétarsson, betur þekktur sem Gói Sportrönd (goisportrond) lofaði því að ef söfnunin færi yfir 250.000 myndi hann raka af sér líkamshárin, alls staðar nema á höfðinu og klæðast svo klappstýrubúningi í einn dag. Markmiðinu var náð og rakaði hann hár af fótum, nára, handarkrika og sportröndina og klæddist svo fallegum klappstýrubúning í vinnuna, vinnufélögunum til mikillar skemmtunar.

Brynja lofaði því að láta aflita augabrúnirnar ef söfnunin færi yfir 500.000 þúsund. Það tókst svo í gær fór Brynja á hárgreiðslustofuna sína og gekk þaðan út með aflitaðar augabrúnir. Brynja viðurkenndi það áður en aflitunin var gerð að hún óttaðist að þær myndu kannski detta af en svo fór ekki og er hún núna með alveg ljósar brúnir, í stíl við hárið.

Hægt er að styrkja söfnunina um 1.500 krónur með því að senda skilaboðin UNICEF í 1900. Einnig er tekið á móti frjálsum framlögum á síðu UNICEF og í gegnum millifærslu í reikningsnúmerið 701-26-102050 og kennitölu 481203-2950.