Áfengi og streita ýta undir kvíða og þunglyndi hjá tónlistarmönnum

Breski tónlistarmaðurinn William Doyle sem spilar á Airwaves í ár segir að tónlistarheimurinn geti verið erfiður starfsvettvangur fyrir þá sem glíma við kvíða og þunglyndi eins og hann gerir sjálfur. Hann segir að streita, álag og mikil áfengisneysla í músíkbransanum ýti undir kvíða og þunglyndi hjá tónlistarfólki.

Sjálfsvíg tónlistarmanna hafa verið í kastljósinu en Chris Cornell fyrrverandi söngvari rokkhljómsveitanna Soundgarden og Audioslave og Chester Bennington söngvari Linkin Park sviptu sig lífi fyrr á þessu ári. Þá hafa fjórir ungir karlmenn, sem allir tengdust íslensku þungarokki, framið sjálfsvíg á árinu.

William Doyle, einn af stofnendum hljómsveitarinnar East India Youth, spilar á Airwaves í ár. Doyle flutti erindi í Bíó Paradís í dag þar sem hann lýsti eigin baráttu við kvíða og þunglyndi.

Rúmlega 70 prósent tónlistarmanna í Bretlandi hafa glímt við kvíða og rúmlega 60 prósent þeirra hafa gengið í gegnum depurð eða þunglyndi samkvæmt nýlegri rannsókn. Doyle segir að þetta skýrist kannski af starfsumhverfi tónlistarmanna. 

„Kröfur starfsins eru mjög erfiðar fyrir fólk. Menn eru í burtu langtímum saman, menningin í kringum starfið byggist á miklu áfengi, fíkniefnaneyslu og þess háttar. Þetta er mjög algengt í þessari grein svo ég held að kröfurnar sem starfið gerir og hvernig fólk fær kannski ekki borgað nógu fljótt og þess háttar geri það að verkum að þetta er mjög ótryggt líf,“ segir Doyle.

Hann segir að geðrænir kvillar hrjái oft fólk í skapandi greinum og að áfengisneysla geti ýtt enn frekar undir þessi vandamál.

„Þeir sem lifa á tónlist eru móttækilegri fyrir sjúkdómum eins og þunglyndi og kvíða. Þegar maður kemur á tónleikastað klukkan 16 til að undirbúa tónleika bíður áfengi eftir manni, það er hvatning til að nota það. Þegar maður gerir þetta aftur og aftur hefur það skaðleg áhrif og áfengi ýtir undir þunglyndi, það veldur meiri vanlíðan. Ef maður hefur þessi vandamál gerir það þau verri. Það er tvímælalaust þannig,“ segir Doyle.