Síminn hagnast um 1.500 milljónir

Hagnaður Símans á fyrstu sex mánuðum ársins nam 1.564 milljónum króna og jókst um 52,4 prósent á milli ára. Fram kemur í tilkynningu að tekjur á öðrum ársfjórðungi námu 7.254 milljónum króna samanborið við 7.475 milljónir króna á sama tímabili 2016.

Rekstrarhagnaður fyrir afskriftir og fjármagnsliði EBITDA nam 2.191 milljónum króna á öðrum ársfjórðungi 2017 samanborið við 1.954 milljónir króna á sama tímabili 2016 og hækkar því um 237 milljónir króna eða 12,1 prósent frá sama tímabili í fyrra. EBITDA hlutfallið er 30,2 prósent fyrir annan ársfjórðung 2017 en var 26,1 prósent á sama tímabili 2016.

Hagnaður á öðrum ársfjórðungi 2017 nam 790 milljónum króna samanborið við 716 milljónir króna á sama tímabili 2016.

Handbært fé frá rekstri án vaxta og skatta nam 1.986 milljónum króna á öðrum ársfjórðungi 2017 en var 1.638 milljónir króna á sama tímabili 2016. Eftir vexti og skatta nam handbært fé frá rekstri 1.864 milljónum króna á öðrum ársfjórðungi 2017 en nam 1.492 milljónum króna á sama tímabili 2016.

Eiginfjárhlutfall Símans hf. var 54,9 prósent í lok annars ársfjórðungs 2017 og eigið fé 35,3 milljarðar króna. 

 „Góð afkoma Símans skýrist af því að tekist hefur að stýra rekstrinum í takt við tekjuöflun félagsins. Hagnaðurinn eykst og reksturinn styrkist. Veltan dregst hins vegar saman og eru hörð verðsamkeppni og lægri reikigjöld helstu ytri áhrifavaldarnir um þessar mundir,“ segir Orri Hauksson, forstjóri, í tilkynningu.

„Auk þess hefur orðið nokkur breyting á starfseminni frá fyrri hluta árs 2016. Félagið seldi Staka, Talenta og útvarpsrekstur auk þess sem EM karla hafði talsverð áhrif á tekjur félagsins á fyrri hluta árs 2016. Velta þessara eininga var nokkru hærri en sem nemur tekjusamdrætti milli ára. Það er ekkert nýtt eða óvænt að fjarskiptamarkaðurinn taki örum breytingum. Vörur vaxa eða hnigna hratt því er stöðug nýsköpun og þróun á innviðum nauðsynleg til að ná árangri til lengri tíma. Sem dæmi má nefna að Síminn kynnir þessa dagana nýja og þægilega greiðslulausn þar sem snjallsíminn tekur við hlutverki greiðslukorta,“ segir Orri.