Íslensku strákarnir skoruðu tvöfalt meira en mótherjarnir

Íslenska 21 árs landsliðið í handbolta vann afar sannfærandi sigur á Sádí Arabíu í dag í öðrum leik sínum á heimsmeistaramóti 21 árs landsliða í Alsír.

Ísland skoraði tvöfalt fleiri mörk en mótherjarnir í leiknum og vann 24 marka sigur, 48-24. Íslenska liðið var komið 24-9 yfir í hálfleik þannig að leikurinn var bara eins og létt æfing.

Ísland tók fljótlega öll völd á vellinum, eftir að Sádar komust í 2-3 skoruðu íslensku strákarnir 10 mörk í röð og komust 12-3 yfir. Það var mjög góður kafli hjá strákunum. Íslensku strákarnir bættu enn í og komust 22-6 yfir með 7 mörkum í röð. Í hálfleik var staðan 24-9 og þetta var frábær fyrri hálfleikur.

Íslensku strákarnir héldu áfram í seinni hálfleik að hafa öll undirtökum í leiknum, sem var þó aðeins jafnari en sá fyrri.

Á 40. mínútu var staðan 32-13 fyrir Íslandi og eftir 50 mínútna leik var staðan 40-18. Í leikslok munaði svo 24 mörkum, 48-24 sigur Íslands og liðið komið með fjögur stig í D riðli keppninnar.

Mörk Íslands í leiknum:

Óðinn Þór Ríkharðsson 8/1

Hákon Daði Styrmisson 7

Birkir Benediktsson 6

Sigtryggur Daði Rúnarsson 6

Kristján Örn Kristjánsson 6

Elliði Snær Viðarsson 3

Þorgeir Bjarki Davíðsson 3

Ýmir Örn Gíslason 2

Ómar Ingi Magnússon 2

Elvar Örn Jónsson 2

Aron Dagur Pálsson 2

Dagur Arnarsson 1

Markvarsla:

Grétar Ari Guðjónsson 14/2 (58%)

Viktor Gísli Hallgrímsson 7 (32%)

Íslenska liðið vann níu marka sigur á Argentínu í fyrsta leik sínum í gær og er því að byrja heimsmeistaramótið vel.

Næsti leikur íslenska liðsins er á móti heimamönnum í Alsír á föstudaginn og fá því strákarnir frídag á morgun. Marokkó og Króatía eru einnig í þessum riðli en fjórar efstu þjóðirnar tryggja sér sæti í sextán liða úrslitum keppninnar.

Þetta verður hörkuleikur á móti Alsír en það má búast við að öll sætin í 8.200 manna höllinni verði setin og á bandi heimamanna.