Júlíspá Siggu Kling – Nautið: Átt það til að festa þig of lengi í sömu vinnunni

7. júlí 2017 09:00

Elsku Nautið mitt. Þú ert svo tilfinningaríkt og hugmyndaríkt í öllu sem þú gerir en það er svo algengt að þú fáir bakþanka og hættir við það sem þig langar að gera og framkvæma. Þá verður þú svo prútt og stillt, en það fer þér engan veginn og gerir þig svo leiðinlegt!

Þú hefur tíma til að breyta því sem þú villt og lykilorðið sem ég ætla að senda þér er: „hugrekki“. Þú skalt segja dag hvern: „Ég er hugrökk“ eða „ég er hugrakkur“.

Þú átt það til að festa þig of lengi í sömu vinnunni og með sömu vinunum því þú ert svo pottþétt. En það getur líka rifið þig niður. Þannig að þú skalt skora á sjálft þig og gera eitthvað nýtt í hverri viku, klæða þig vel og hafa til, ákveða á morgnana hvernig þú vilt hafa daginn því andlegra og sterkara merki er ekki til. Notaðu þessa orku þína til þess að njóta þess hversu einstakt þú ert.

Og já, ég tala við þig eins og þú sért „það“, vegna þess að Nautið er það, Nautið.

Ef þér finnst eins og sami hluturinn sé að koma fyrir þig aftur og aftur, eitthvað sem þér líkar ekki við, þá ertu á vitlausri tíðni og ert að bölsótast yfir því sem hefur gerst. En með því að bölsótast heldur veröldin að þú sért að kalla á það sama aftur og aftur. Um leið og þú ákveður að breyta um stíl og tala um það sem þig langar í, þá áttu svo auðvelt með að tileinka þér bæði himininn og jörðina; allan alheiminn!

Þú ert sérstakt góðmenni sem skilur eftir þig svo miklar tilfinningar gagnvart þínum nánustu. Þannig að það besta sem þú getur gert á hverjum degi er að búa til minningu fyrir aðra. Og þú skalt ákveða að vera góð minning, því þegar upp er staðið eru það minningar sem gera manninn. Það tekur svolítinn tíma fyrir þig að þróa þetta en þar sem þú hefur eina merkilegustu plánetu í veröldinni eins og t.d Venus í merki þínu verður það þér auðvelt.

Þú ert búið til úr ást og þegar þú gefur bara ást af þér þá mun lífsins rússíbani fara með þig á ótrúlegustu slóðir. En það er samt mjög algengt að þú lendir í því að vera kýlt niður og þá getur þú ekki stjórnað för þinni almennilega. En um leið og þú sleppir tökunum og trúir að það sé þér fyrir bestu þá verður þú sigurvegari.

Þú átt eftir að sjá að það er gott veður í sumar á Íslandi. Og þú átt eftir að laða að þér fólk sem þú átt eftir að betrumbæta með húmor þínum og ást. Ef þú ert á lausu þá skaltu leita þér að manneskju sem er tilfinningarík, talar skýrt og er einlæg. Þú þolir ekki óheiðarleika en átt það samt til að gefa fólki of mikinn séns.

Mottóið þitt er: Carpe Diem, gríptu daginn, gríptu augnablikið eða gríptu hvað sem er.

Ást og friður, Sigga Kling

Fræg Naut: Aron Einar Gunnarsson fyrirliði íslenska knattspyrnulandsliðsins, Hannes Þór Halldórsson markvörður, Ari Freyr Skúlason landsliðsmaður, Svali Kaldalóns fjölmiðlamógúll, Guðrún Veiga Guðmundsdóttir, rithöfundur og latikokkur, Ellý Ármanns fjölmiðlakona, Friðrik Þór Friðriksson leikstjóri, Valtýr Björn Valtýsson íþróttafréttamaður, Ólafur Ragnar Grímsson forseti, Álfheiður Ingadóttir þingkona, Halldór Laxness, rithöfundur og skáld, Rúnar Freyr Gíslason leikari, Garðar Thor Cortes söngvari, Helga Möller söngkona, Katrín Tanja Davíðsdóttir crossfit-meistari, Nanna Bryndís Hilmarsdóttir söngkona, Pétur Jóhann Sigfússon, Addi Exos dj-snillingur, Davíð Rúnar Bjarnason, boxari.

Stjörnuspá Siggu Kling

Mest lesið

Fleiri fréttir

Mest lesið

Fleiri fréttir

Mest lesið

Tarot dagsins