Hvorki leikmenn Fram né aðstoðarþjálfarinn skilja hvers vegna Ásmundur var rekinn

Fram vann 1-0 sigur á Gróttu í Inkasso-deildinni í fótbolta í gær en stigin þrjú voru nauðsynleg rétt til að lægja öldurnar eftir furðulegan brottrekstur þjálfarans Ásmundar Arnarssonar í vikunni.

Ásmundur var með Fram í fimmta sæti deildarinnar þegar að hann var rekinn í byrjun vikunnar en bæði hann og fleiri hafa lýst yfir undrun sinni á brottrekstrinum.

Ólafur Brynjólfsson, aðstoðarþjálfari Ásmundar, stýrði Fram í leiknum í gær og hann viðurkenndi fúslega eftir leikinn að hann var hreinlega ósammála stjórninni þegar kom að því að víkja Ásmundi úr starfi.

„Ég var ekki sammála henni [ákvörðuninni]. Það er satt. En svona er lífið sem þjálfari. Maður veit ekkert hvað gerist í þessu,“ sagði Ólafur við fótbolti.net eftir leikinn í gær.

Hann sagðist ekki vilja ræða það hvort hann myndi halda áfram með liðið. „Ég mun alltaf taka ákvörðun. Þetta kemur bara í ljós,“ sagði Ólafur.

Sigurpáll Melberg Pálsson, fyrirliði Fram, var alveg jafnhissa á brottrekstri Ásmundar og ræddi hann einnig í viðtali við fótbolti.net eftir leik.

„Það voru allir jafn gáttaðir á því og stuðningsmennirnir. Það verður að segjast eins og er. Það bjóst enginn við þessu. Svona er þetta stundum, stjórnin ræður þessu,“ sagði fyrirliðinn og bætti við: „Það voru allir, þar á meðal ég, mjög sáttir með hans störf. Hann gerði gott verk," sagði Sigurpáll Melberg Pálsson.