WOW air gefur ekki upp hvort flugmenn Icelandair svari kallinu

Upplýsingafulltrúi WOW air getur ekki sagt til um það hvort umsóknir, sem borist hafa fyrirtækinu í kjölfar auglýsingar sem birtist í Fréttablaðinu í gær, séu frá flugmönnum Icelandair. Ekki fengust heldur bein svör við því hvort nýjar ráðningar WOW air verði ræddar á kynningarfundi félagsins í dag sem auglýstur var samhliða ráðningunum.

115 flugmönnum var sagt upp störfum hjá Icelandair um helgina vegna árstíðabundinna sveiflna í ferðamannaþjónustu hér á landi. Þá var 70 flugstjórum tilkynnt að þeir verði færðir niður í stöðu flugmanns næsta vetur.

WOW air, helsti keppinautur Icelandair á íslenskum flugmarkaði, auglýsti í kjölfarið lausar stöður 115 flugmanna og 70 flugstjóra. Auglýsingin birtist á baksíðu Fréttablaðsins í gær en ljóst þykir að hún sé bein vísun í uppsagnir Icelandair.

Í skriflegu svari við fyrirspurn Vísis staðfestir Svanhvít Friðriksdóttir, upplýsingafulltrúi WOW air, að umsóknir hafi borist vegna auglýsingarinnar. Hún getur þó ekki gefið það upp hvort umsóknirnar séu frá flugmönnum Icelandair.

„Við höfum þegar fengið mjög góð viðbrögð og fjöldi umsókna hefur borist. Við getum ekki tjáð okkur um hver bakgrunnur umsækjanda er vegna trúnaðar við þá.“

Kynningarfundurinn hugsaður til að laða að umsækjendur

Í auglýsingu WOW air í Fréttablaðinu var einnig greint frá kynningarfundi sem fram fer á veitingastaðnum Nauthól í Reykjavík klukkan 15 í dag. Ekki fengust bein svör frá flugfélaginu um það hvort ráðningarnar, sem vísuðu til uppsagna Icelandair, verði ræddar á kynningarfundinum. Svanhvít segir fundinn hugsaðan sem kynningarfund fyrir mögulega umsækjendur.

„Fundurinn er hugsaður til að kynna starfsemi WOW air með áherslu á vinnustaðinn fyrir mögulegum umsækjendum. Kynningar sem þessar eru alþekktar í flugheiminum (roadshows) og eru notaðar til að laða að umsækjendur og veita áhugasömum upplýsingar um það starfsumhverfi sem er í boði.“

Árstíðabundnar uppsagnir ekki í uppsiglingu hjá WOW air

Þá segir Svanhvít engar árstíðabundnar uppsagnir í kortunum hjá Wow air.

„Nei, WOW air hefur ekki þurft að segja upp starfsfólki vegna árstíðabundinna sveiflna enda félagið í örum og stöðum vexti.“

Skúli Mogensen, forstjóri WOW air, sagði í viðtali við Fréttablaðið á mánudag að fyrirtækið gæti hæglega ráðið fleiri en hundrað flugmenn á næstu mánuðum. Auglýsing WOW air um ráðningarnar birtist degi síðar.

Svanhvít segir jafnframt mikla samkeppni ríkja um flugmenn almennt í heiminum en vöxtur félagsins hafi frekari ráðningar í för með sér.

„Á síðustu vikum höfum við bætt fimm nýjum þotum við flotann og áætlað er að bæta við sjö þotum á næsta ári. Á síðustu mánuðum hefur félagið verið að bæta við flugmönnum og er það í áframhaldandi ferli.“