Bakvið tjöldin við tökur á Game of Thrones: "Ísland eini staðurinn sem kemur til greina“

Í síðasta mánuði kom út ný stikla fyrir nýjustu seríu Game of Thrones og eru aðdáendur að verða spenntir fyrir því að sjöunda þáttaröðin hefjist í júlí.

Þáttaröðin átti upphaflega að fara fyrr í loftið en dróst á langinn meðal annars vegna snjóleysis hér á Íslandi. Tafði það upptökur svo að frumsýningu var frestað.

Tökuliðið var hér á ferð um miðjan janúar og fóru tökur meðal annars fram á Svínafellsjökli, í Reynisfjöru og við Jökulsárlón. Þetta var í fimmta skipti sem tökulið þáttanna kemur hingað til lands.

Þáttaröðin sjálf, sem verður sú næstsíðasta í röðinni, hefst 16. júlí næstkomandi. Þættirnir verða sýndir samtímis í fjölda landa, þar á meðal á Stöð 2 á Íslandi.

Nú hefur verið gefið út myndskeið sem sýnir bak við tjöldin frá tökunum á Íslandi og einnig á Spáni.

„Við elskum öll að koma til íslands, þar er allt svo fallegt,“ segir Bernie Caulfield, úr GOT teyminu.

„Á hverjum degi þegar sólin rís fáum við nýja gjöf fyrir okkur sem tökulið. Það getur verið mjög erfitt að taka upp á Íslandi,“ segir Caulfield.

„Myndatökumennirnir eru oft í vandræðum með að finna fókusinn þar sem þeir eru kannski að drepast úr kulda á fingrunum.“

Snow sáttur

„Þetta náttúruumhverfi gefur þáttunum raunverulegan blæ,“ segir Kit Harington, einn af aðalleikurum þáttanna en hann fer með hlutverk Jon Snow.

Alveg frá því í annarri seríu hefur Ísland alltaf verið tökustaðurinn þegar atburðir eiga að gerast norðan veggjarins.

„Það er oft gaman að mæta á tökustað í myrkrinu og síðan sjá hvernig staðurinn lítur út þegar sólin kemur upp. Þá áttar maður sig á því að þessi staður mun algjörlega gera þáttinn að því sem hann er.“

„Ef við viljum gefa norðrinu villt umhverfi, þá er Ísland eini staðurinn sem kemur til greina,“ segir Kristofer Hivju, sem leikur Tormund.

Hér að neðan má sjá myndbandið sjálft.