Smári segir málflutning Bjartar fyrirlitlegan

„Skammastu þín,“ segir Smári McCarthy þingmaður Pírata við Björt Ólafsdóttur umhverfisráðherra á Facebook. Og talar fyrir hönd margra þeirra sem gagnrýnt hafa hvernig Sigríður Á Andersen dómsmálaráðherra og ríkisstjórnin hafa staðið að skipan ráðherra í nýtt millidómsstig.

Jón Þór Ólafsson þingmaður Pírata sagði, þá er hann gerði grein fyrir atkvæði sínu, að þetta væru pólitískar skipanir. Og slíkar skipanir kosti, þar sé verið að fórna trausti fyrir pólitíska hagsmuni. Fyrir stjórnarsamstarf og það hafi margir á þingi gert og þeir viti það.

Femínistar og „svokallað faglegt mat“

Hvort Björt Ólafsdóttir er sér meðvituð um það eða ekki þá vill hún ekki leggja málið upp með þeim hætti á Facebooksíðu sinni. Þar sem hún vænir þá sem gagnrýna málsmeðferðina um að vera andsnúnir jafnréttindum.

„Það er ótrúlegt að hlusta á femínistanna alla í stjórnarandstöðunni gagnrýna að 7 konur og 8 karlar eru skipaðir í Landsrétt af Dómsmálaráðherra í stað 10 karla og 5 kvenna sem að svokallað faglegt mat hæfisnefndar lagði til. Það er gamla Ísland. Ég fagna því að dómsmálaráðherra leggur til eitthvað meira í anda 2017, og furða mig á því að aðrir geri það ekki. Rétt kynjahlutföll í Landsrétti er gríðarlega mikilvægt mál til þess að vinna réttinum traust. Þarf að minna á endalaus tilvik td í kynferðisbrotamálum þar sem það hefur verið mál manna við lestur sýknudóma að lítill skilningur karldómara til reynslu kvenna þar hafi verið vandamál og haft áhrif á dóma til miska fyrir konur? Hér er stigið stórt skref í þá átt að konur og karlar verði sett jafnfrétthá í íslensku réttarkerfi.“

Svo mörg eru þau orð og víst er að ekki falla þau í kramið á öllum bæjum. Athugasemdirnar streyma inn á Facebooksíðu Bjartar.

Gráta atkvæði sitt til BF

Þessar glósur Bjartar hafa snúið mörgum andhæris; þeim þykir mörgum þetta yfirgengilega ósvífinn málflutningur og láta margir þá skoðun í ljós á Facebooksíðu Bjartar. Sumir telja að hún hljóti að vera að grínast, aðrir að hún sé að stimpla sig út og enn aðrir gráta það að hafa kosið Bjarta framtíð. „Maðurinn minn kaus Bjarta Framtíð. Ég hins vegar hætti við það á síðustu stundu. Guði sé lof og almenna þakkargjörð, þarf ekki að engjast eins og betri helmingurinn af eftirsjá á atkvæði mínu.“

Illugi Jökulsson rithöfundur veltir því fyrir sér hvort Björt trúi því að lesendur síðu hennar séu fábjánar? Og þannig má lengi áfram telja. Facebookvinir Bjartar vanda henni ekki kveðjurnar.

Sigríður Andersen ekki staðið fyrir jafn/kven-eitteðaneitt

Sigríður Rut Júlíusdóttir lögmaður er ein þeirra sem vill benda Björt á að hún vaði villu og svíma. Hún leggur orð í belg á síðu Bjartar og segir meðal annars: „Ef lægst metnu karlarnir skv hæfinefnd hefðu verið teknir út og konur settar í staðinn þá myndi þessi skýring hljóma sennilega. En þegar einum hæfasta dómaranum okkar er kippt út úr 7. sæti þá lítur frekar illa út að hann hafi einu sinni um stund verið varaþingmaður vinsta megin. Lítur þetta því allt saman út eins og eftiráskýring. Fyrir nú utan það að Sigríður Andersen hefur hingað til ekki staðið fyrir jafnlaunavottun eða jafn/kven-eitteðaneitt.“

Með öðrum orðum, fólk er almennt á því að það sé afar ósvífið að verja þetta sem margir vilja meina að sé ekkert annað en gamaldags pólitísk misbeiting við að troða rétta fólkinu í réttu stöðurnar með því að vísa til kynjakvóta.

Óásættanlegur málflutningur

Smári McCarthy þingmaður skefur ekki af því en honum þykir sýnt að Björt hafi ekki tekið þátt í umræðunni á þingi. „Að gera þetta sem kynjajafnréttismál, þegar þetta er augljóslega um faglegt mat og tryggja traust til dómstóla, er fyrirlitlegt. Það er algjörlega óásættanlegt að mála andstæðinga þessa verklags upp sem andstæðinga kynjajafnréttis. Skammastu þín,“ segir Smári.

Og hann bætir við: „Það eru allir hlynntir jöfnum kynjahlutföllum. Ef það hefðu verið öll rökin og einu breytingarnar, þá allt í lagi. En það er fleira gert, og það vakti tortryggni, sem var svo ekki slegið á með rökstuðningi. Það er algjörlega óásættanlegt að reyna að mála okkur sem viljum betri málsmeðferð upp sem andstæðinga kynjajafnréttis.“

Meira fúsk

Og enn ein sem sárnar málflutningur Bjartar er Björk Vilhelmsdóttir fyrrverandi borgarfulltrúi. Hún telur Björt hafa staðið sig vel sem umhverfisráðherra. En...

„En því miður reynir hún að rökstyðja gróf, gamaldags, pólitísk afskipti af dómsvaldinu með kynjasjónarmiðum sem ekki eiga við. Þó körlum hafi fækkað voru teknir karlar neðarlega úr hæfnismati fram yfir mun hæfari konur, bara til þess eins að tryggja réttar pólitískar skoðanir Landsréttar. Nú hafa ráðherrar Íslands sem bæði hafa framkvæmdar- og löggjafarvald einnig tryggt sér "rétta" dómsvaldið. Ég vil framtíð þar sem við aðskiljum þrískiptingu valdsins. Mín framtíð (og fortíð) er því ekki Björt,“ skrifar Björk og bætir við myllumerki og „MeiraFúsk“