Mál sextán ára samkynhneigðs hælisleitanda tekið til efnislegrar meðferðar

Kærunefnd útlendingamála komst í dag að þeirri niðurstöðu að hælisumsókn sextán ára marokkósks drengs og bróður hans skuli teknar til efnislegrar meðferðar.

Lögfræðingur Rauða krossins segir mál drengsins hafa sérstöðu umfram önnur mál hælisleitenda hér á landi.

Drengurinn kom hingað til lands frá Spáni í lok nóvember á síðasta ári ásamt eldri bróður sínum sem er yfir átján ára aldri en þangað höfðu þeir flúið heimalandið vegna hættu á ofsóknum, en yngri bróðirinn er samkynhneigður.

Samkynhneigð í heimalandi þeirra, Marokkó er ólögleg bæði í lagalegum og trúarlegum skilningi og hafa þeir sem viðurkennt hafa samkynhneigð þar í landi orðið fyrir ofsóknum og útskúfun frá samfélaginu og jafnvel dæmdir til fangelsisvistar.

Útlendingastofnun synjaði hælisbeiðni bræðranna í maí og var sú ákvörðun kærð til kærunefndarinnar.

Sjá einnig: Sextán ára fylgdarlausum dreng vísað úr landi

„Kærunefndin felldi úr gildi ákvörðun Útlendingastofnunar í báðum málunum og fyrirskipaði að umsóknir beggja yrðu teknar til efnislegrar meðferðar á Íslandi,“ segir Arndís Anna K. Gunnarsdóttir, lögfræðingur og talsmaður hælisleitenda hjá Rauða krossi Íslands.

„Það þýðir að þeir verða boðaðir til viðtals hjá Útlendingastofnun þar sem þeir verða spurðir út í ástæður þess að þeir yfirgáfu heimaland sitt, sem þeir hafa ekki verið spurðir út í hingað til. Þá verður metið hvort þeir uppfylli skilyrði stöðu flóttamanns eða viðbótarverndar eða mannúðarleyfis vegna aðstæðna í Marokkó.“

Arndís segir að efnisleg meðferð slíkra mála hafi undanfarið verið að dragast innan Útlendingastofnunar og gerir hún ráð fyrir að málið muni taka minnst þrjá mánuði. Hún segir að staða bræðranna sé mjög óljós.

„Hún er í rauninni óljós vegna þess að fólki er ekki veitt vernd vegna almennra aðstæðna í Marokkó. Svona almennt er Marokkó talið getað verndað sína borgara en það geta verið einstaklingsbundin atvik sem valda því að einstaklingar eigi rétt á vernd eða dvalarleyfi af mannúðaraðstæðum,“ segir Arndís og bætir við að mál bræðranna séu mjög ólík.

„Annars vegar vegna þess að annar þeirra er barn og hinn ekki og hins vegar vegna þess að sá sem er barn er samkynhneigður og hinn ekki. Það vissulega hefur gríðarlega mikla þýðingu og gerir það að verkum að þó að ekki sé búið að skoða mál hvorugs þeirra í kjölinn ennþá eru fleiri flögg á lofti hjá yngri bróðurnum og kannski augljósara að hann eigi rétt á vernd. En það er ekki útilokað um eldri bróðurinn, það á eftir að skoða sögu þeirra betur og aðstæður. Við eigum bara eftir að sjá hvernig Útlendingastofnun metur þetta.“