N-Kóreumenn hóta að varpa kjarnorkusprengju á Bandaríkin

Norður-Kóresk yfirvöld munu skjóta upp kjarnaoddum og beina þeim að Bandaríkjunum, ef herskipin sem bandarísk yfirvöld hafa sent að Kóreuskaga, gera eitthvað til þess að ógna yfirvöldum þar í landi. Reuters greinir frá.

Þessar hótanir komu fram í norður-kóreska ríkisfjölmiðlinum og hefur Donald Trump, forseti Bandaríkjanna, nú þegar tjáð sig um þær á Twitter. Þar segir hann að Bandaríkin muni takast á við Norður-Kóreu með, eða án Kína.

Spennan á Kóreuskaga hefur aukist mikið nýverið, vegna fregna af kjarnorkuvopnaþróun og tilraunum Norður-Kóreumanna. Talið er að norður-kóresk yfirvöld muni brátt gera enn eitt tilraunaskotið með kjarnorkusprengju.

Á blaðamannafundi í dag, segir Sean Spicer, blaðamannafulltrúi Hvíta hússins, að bandarísk yfirvöld telji ekki ástæðu til þess að óttast þessar hótanir Norður-Kóreumanna, þar eð engin gögn bendi til þess að þeir séu komnir nógu langt á veg í þróun kjarnaodda til þess að geta varpað slíkum sprengjum á bandarískt meginland.

North Korea is looking for trouble. If China decides to help, that would be great. If not, we will solve the problem without them! U.S.A.

— Donald J. Trump (@realDonaldTrump) April 11, 2017