Alvarlegt umferðarslys á Eyjafjarðarbraut vestari

Alvarlegt umferðarslys varð á Eyjafjarðarbraut vestari rétt fyrir klukkan 16 í dag. Slysið varð á veginum skammt sunnan við Hrafnagil.

Á Facebook-síðu lögreglunnar á Norðurlandi eystra segir að strax hafi verið ljóst að um alvarlegt slys væri að ræða og hafi viðbragsaðilar farið á staðinn á hæsta forgangi.

„Einn aðili var fluttur strax á sjúkrahúsið á Akureyri og er ekki hægt að gefa upplýsingar um ástand hans að svo stöddu.

Eyjafjarðarbraut vestari var lokað við gatnamótin við Miðbraut og er umferð beint um hana yfir á Eyjafjarðarbraut eystri.

Einnig er veginum lokað sunnan við slysstað og er fólki bent á að fara um Eyjafjarðarbraut eystri. Óvíst hversu lengi veginum verður lokað,“ segir í tilkynningu lögreglu.

Uppfært 17:33:

Búið er að opna veginn.