Endurtekið hvött til að leggja aftur fram kæru á hendur skipverjanum fyrir kynferðisbrot

Grænlensk kona segist endurtekið hvött af löndum sínum til þess að kæra aftur skipverja á grænlenska togaranum Polar Nanoq fyrir kynferðisbrot. Málið fór aldrei fyrir dómstóla á sínum tíma en meintur gerandi í málinu er annar skipverjanna sem situr í gæsluvarðhaldi grunaður um manndráp í máli Birnu Brjánsdóttur. 

Konan, sem tjáði sig um málið á Facebook, segist ekki ætla að kæra málið aftur að svo stöddu og vonast til þess að fólk hætti að senda henni skilaboð vegna þessa. Hún vill lítið tjá sig frekar um málið í samtali við Vísi. Hvarf Birnu og umfjöllun um málið hafi haft áhrif á sig en málið hefur verið mikið til umfjöllunar á Grænlandi sökum þess að skipverjarnir tveir, sem eru í gæsluvarðhaldi, eru grænlenskir.

Maðurinn sem um ræðir er sá sem ók rauða Kia Rio bílnum laugardagsmorguninn sem Birna hvarf. Stundin hefur fjallað um afbrotasögu mannsins sem hefur hlotið fíkniefnadóm auk þess sem fyrrnefnd kona kærði hann fyrir kynferðisbrot. Kæran var hins vegar aldrei tekin fyrir hjá dómstólum í Grænlandi.

Íslensk kona, búsett á Grænlandi, segist vona að mál Birnu opni á umræðuna um ofbeldi á Grænlandi. Þögnin sé áþreifanleg og minni á stöðu mála á Íslandi fyrir áratugum. Þá segir grænlensk fréttakona að allt samfélagið fylgist með málinu og sektarkenndin sé mikil.

Ekki ljóst hvort grunur leiki á kynferðisbroti

Íslenska lögreglan hefur ekki viljað svara því hvort grunur leiki á því að kynferðisbrot hafi verið framið umrædda nótt.

Áhöfn þyrlu Landhelgisgæslunnar kom auga á Birnu í sínu fyrsta eftirlitsflugi eftir strandlengjunni á suðvesturhorninu. Sást hún greinilega úr þyrlunni sem flogið er á 60-70 kílómetra hraða á klukkustund. Þá hafði hennar verið saknað í rúma átta sólarhringa.

Komið hefur fram að hinn skipverjinn var afar drukkinn umrædda nótt. Sat hann að sumbli í nokkra tíma á Enska barnum í Austurstræti áður en hinn mætti á svæðið. Barþjónninn María Káradóttir sagði í viðtali við Stundina að hann hefði sofnað fram af borðinu og verið vísað út. Reyndi hann að hringja fimm sinnum í Maríu frá 03:55 til 05:19 og svo aftur klukkan 06:03 og 06:04. 

Skipverjarnir komu á rauða Kia Rio bílnum að landganginum á Polar Nanoq í Hafnarfjarðarhöfn klukkan 6:10 á laugardagsmorgun. Lögregla telur að Birna hafi farið í bílinn klukkan 5:25 við Laugaveg og enn verið í bílnum klukkan 6:10 í Hafnarfjarðarhöfn.

Blóð, skilríki og hrein úlpa

Í framhaldinu sést fulli skipverjinn fara um borð og fer aldrei aftur í bílinn.  Hinn ekur um hafnarbakkann og svo frá svæðinu þegar klukkan nálgast sjö. Ekkert sést til bílsins við svæðið næstu fjórar klukkustundirnar eða svo. Hefur lögregla óskað eftir myndskeiðum frá ökumönnum á stóru svæði á suðvesturhorninu til að kortleggja ferðir bílsins. Fram kom á Vísi fyrir helgi að lögregla hafi ákveðnar hugmyndir hvar líki Birnu var komið fyrir.

Um hádegisbil sést skipverjinn svo aka inn á þann hluta hafnarsvæðisins þar sem skór Birnu fundust á mánudagskvöld. Telur lögregla að skónum hafi verið komið fyrir þar en gefur þó ekkert uppi um það hvort talið sé að tilgangurinn hafi verið að villa um fyrir lögreglu eða ekki.

Skilríki Birnu fundust um borð í Polar Nanoq auk þess sem þriðji skipverji hefur greint lögreglu frá því að hann hafi gleymt úlpu sinni í bílnum en fengið hana hreina til baka á laugardeginum. Sá var handtekinn um borð í Polar Nanoq en síðar sleppt þegar ljóst þótti að hann tengdist ekkert málinu.

Ekki liggur fyrir játning í málinu en lögregla tjáir sig ekki um upplýsingar sem fram koma í yfirheyrslum. Reiknað er með því að mennirnir verði yfirheyrðir eftir helgi. Gæsluvarðhald yfir mönnunum rennur út á fimmtudaginn í næstu viku. Lögregla vill ekkert tjá sig um það hvort annar skipverjinn sé grunaður um alvarlegra brot en hinn.

Skipverjinn sem ók bílnum er einnig grunaður um smygl á 20 kílóum af hassi sem fundust við leit íslensku lögreglunnar og tollgæslu um borð í Polar Nanoq. Hann hefur áður hlotið dóm á Grænlandi fyrir fíkniefabrot.