Djúp lægð veldur vaxandi vindi eftir hádegi

Nú í morgunsárið er vaxandi lægð djúpt suðvestur af landinu sem nálgast og veldur vaxandi vindi eftir hádegi. Það gengur í austan 13-20 m/s á sunnanverðu landinu seint í dag og rigning eða slydda fylgir, en hægari vindur fyrir norðan og dálítil snjókoma. Hiti 0 til 6 stig, mildast syðst.

Gengur síðan í norðaustan storm með hríð á Vestfjörðum seint í kvöld og víðar um norðanvert landið í nótt.

Áðurnefnd lægð fer til austurs fyrir sunnan land og verður hún væntanlega stödd suður af Hornafirði í fyrramálið. Það þýðir að vindur á morgun verður norðlægari, hvassviðri eða stormur um mestallt land. Úrkomulítið sunnantil, annars snjókoma, talsverð um landið norðaustanvert. Akstursskilyrði geta orðið erfið og/eða færð spillst. Fer að draga úr vindi og úrkomu seint á morgun, fyrst vestanlands. Kólnar smám saman þegar kemur fram á morgundaginn þegar kaldara loft úr norðri færist yfir landið

Veðurhorfur á höfuðborgarsvæðinu:

Minnkandi vindur með morgninum og úrkomulítið. Gengur í austan 10-15 seinnipartinn með rigningu, en 13-18 í kvöld. Hiti 1 til 5 stig. Lægir í nótt, en snýst í norðan 8-15 á morgun með þurrviðri og kólnar smám saman.

Horfur næsta sólarhringinn á öllu landinu:

Vaxandi vindur eftir hádegi. Austan 13-20 m/s á sunnanverðu landinu seint í dag og rigning eða slydda, en hægari fyrir norðan og dálítil snjókoma. Hiti 0 til 6 stig, mildast syðst. Gengur í norðaustan 18-23 með snjókomu á norðanverðu landinu seint í kvöld og í nótt, fyrst á Vestfjörðum.

Norðaustan og norðan hvassviðri eða stormur um mestallt land á morgun. Úrkomulítið sunnantil, annars snjókoma, talsverð um landið norðaustanvert. Fer að draga úr vindi og úrkomu seint á morgun, fyrst vestanlands. Kólnandi veður.

Veðurhorfur á landinu næstu daga

Á mánudag:

Norðaustan og norðan 15-23 m/s. Úrkomulítið sunnantil, annars snjókoma, talsverð um landið norðaustanvert. Fer að draga úr vindi og úrkomu seinnipartinn, fyrst vestanlands. Frost 0 til 4 stig, en frostlaust við suður- og austurströndina fram eftir degi.

Á þriðjudag:

Fremur hæg breytileg átt, en norðaustan 8-13 með norðurströndinni. Dálítil él norðan- og austanlands, annars úrkomulaust. Líkur á snjókomu sunnanlands um kvöldið. Frost 1 til 7 stig.

Á miðvikudag og fimmtudag:

Norðlæg átt og él um landið norðanvert, en yfirleitt þurrt sunnan heiða. Kólnandi veður.

Á föstudag og laugardag:

Fremur hæg norðlæg eða breytileg átt. Sums staðar dálítil él við sjávarsíðuna, annars léttskýjað með köflum. Mjög kalt á landinu.