McMaster heimsækir Afganistan til að ræða öryggismál

H.R. McMaster, þjóðaröryggisráðgjafi í ríkisstjórn Donald Trump, er um þessar mundir staddur í Afganistan, en í dag hitti hann forseta landsins, Ashraf Ghani, ásamt öðrum yfirmönnum afganskra öryggissveita. Reuters greinir frá.

Á fundi sínum var farið yfir stöðu mála í Afganista, en um þessar mundir berjast afganskar öryggissveitir við vígamenn ISIS sem og vígamenn Talíbana.  

Spurningar hafa vaknað um það í hversu miklum mæli ríkisstjórn Trump, hyggst beita sér í landinu, þá sérstaklega eftir að bandaríski herinn varpaði „móður allra sprengja“ á ISIS liða nú á dögunum.

Yfirmaður Bandaríkjahers í Afganistan hefur kallað eftir auknum herafla í landinu, til að stemma stigu við vígamönnum. 

Í dag eru nærri 9000 bandarískir hermenn staddir í Afganistan, til þess að vera afgönskum öryggissveitum innan handar og sjá um þjálfun þeirra.