Varað við hvassviðri á Suðurlandi annað kvöld

Veðurstofan varar við allhvassri austanátt syðst á landinu seint annað kvöld og fram á fimmtudagsmorgun. Slíkur vindur geti verið varasamur fyrir farartæki sem eru viðkvæm fyrir vindi eins og húsbíla og hjólhýsi.

Að öðru leyti gera veðufræðingar Veðustofunnar ráð fyrir fremur hægri breytilegri átt og stöku skúrum norðantil, en úrkomulitlu í nótt.

Á morgun gengur í suðaustan 8-13 m/s og rigningu með köflum. Hægari breytileg átt verður á Norðurlandi, skýjað með köflum og síðdegisskúrir en þurrt að mestu á Austurlandi.

Hiti verður átta til sautján stig að deginum, hlýjast í innsveitum norðaustantil. Gengur í allhvassa austanátt syðst á landinu seint annað kvöld.