Aprílspá Siggu Kling - Tvíburinn: Núna er rétti tíminn til að spýta í lófana

Elsku Tvíburinn minn, það er náttúrulega alveg á hreinu að draumar hafa ekki síðasta söludag og þínir draumar eru í óðaönn að rætast. Gefðu þér aðeins tíma til að skoða hvað þú mátt vera þakklátur fyrir, þá sérðu að þú ert kominn miklu lengra en þú bjóst við. Þú hefur þann hæfileika að geta yfirleitt verið í núinu af því að þér finnst gaman að lífinu. En þegar einhver setur út á þig og hristir líf þitt til þá geturðu kallað yfir þig vonleysi.

Það sést svo langar leiðir þegar þú finnur fyrir vonleysi, þú ert nefnilega manneskjan sem átt að hressa aðra við og þar af leiðandi verður heimurinn hissa þegar hann sér að þér líður illa. En núna er rétti tíminn til að spýta í lófana, hversu sóðalegt sem það nú er, því að þú ert að nálgast orku sem gefur þér kraftaverk, þú ert að nálgast orku sem magnar upp það sem þú hugsar svo settu góðar og framsæknar hugsanir í hjarta þitt, þá líður þér betur og ef þér líður betur finnurðu hamingjuna.

Er það ekki það eina sem þú vilt? Það kemur fyrir að þér finnst þú vera svolítið aleinn í heiminum en það er svo sannarlega vitleysa, það eru margir sem treysta á þig og þú þarft að sjá það betur að það er fjölskyldan sem skiptir öllu máli í ferli lífsins, þar býr hamingjan.

Ég veit að allmörg ykkar vita þetta og eru með þetta alveg á hreinu, fólk er gjörsamlega heillað af þér, bæði hvernig þú talar og hversu mikla ástríðu þú gefur frá þér. Þú ert eins og gangandi ástarkaleikur, þú þarft að læra að njóta þess hvaða krafta þú gefur frá þér og muna að hamingjan býr að sjálfsögðu í þér, og í fólki sem er nálægt þér. Það eru margir sem munu elta þig ef þú flytur þig til og það eru miklir möguleikar á búferlaflutningum á næstu mánuðum. Þú átt eftir að redda því sem þú þarft og mottóið þitt er sjálfsögðu ÞETTA REDDAST!

Frægir Tvíburar: Ragnar Sigurðsson landsliðsmaður, Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland, Donald Trump, Þórarinn Þórarinsson blaðamaður.