Innlent

Tóftirnar í Kanada passa við lýsingar í Vínlandssögunum

Kristján Már Unnarsson skrifar
Sænskur fornleifafræðingur, sem rannsakaði einu staðfestu húsarústirnar um veru norrænna víkinga í Ameríku, segir þær passa nákvæmlega við lýsingar í Vínlandssögunum og kveðst viss um að sjálfur Leifur heppni hafi reist þær. Þetta kom fram í þættinum Landnemarnir og í fréttum Stöðvar 2. 

Rústirnar eru á norðurodda Nýfundnalands á stað sem kallast L'Anse aux Meadows en það var ekki fyrr en eftir að fornleifauppgreftri lauk þar sem hægt var að fullyrða að norrænir menn hefðu verið þarna á ferð fyrir þúsund árum, um 500 árum áður en Kólumbus kom til Ameríku.

Frá norrænu búðatóftunum á Nýfundnalandi. Aldursgreiningar benda til að þær hafi verið byggðar í kringum árið 1000, á þeim tíma sem fornsögurnar segja að Leifur Eiríksson hafi siglt til Vínlands. Safnbygging L'Anse aux Meadows sést fjær undir klettunum.Stöð 2/Kristján Már Unnarsson.
Víkingabúðirnar hafa nú verið endurreistar í þeirri mynd sem fornleifarannsóknir gefa af þeim. Á safni á staðnum má sjá muni sem fundust, eins og bronsnál og snældusnúð, sem sannfærðu menn um norrænan uppruna. 

„Það var fullsannað að þetta væru norræn hús. Byggingartæknin er norræn og munirnir styðja það,“ segir Dale Wells, forstöðumaður safnsins, sem rekið er á vegum þjóðgarða Kanada. 

„Kolefnagreining sýnir að þau eru um 1000 ára en það var þá sem Vínlandsferðirnar hófust, um 998-1000,“ segir Dale Wells.

Ein af smjörhnetunum sem fundust í norrænu tóftunum. Þær gátu aðeins hafa borist þangað með mönnum fyrir þúsund árum og þar sem smjörhnetutré vaxa á sömu slóðum og vínviður þótti ljóst að sagan um Vínland gat staðist.Stöð 2/Friðrik Þór Halldórsson.
Það voru norsku fornleifafræðingarnir Anne Stine og Helge Ingstad sem uppgötvuðu rústirnar árið 1960 en rannsóknir þar stóðu stóðu yfir í hartnær tuttugu ár.

Nokkrar smjörhnetur voru kannski þær fornleifar sem gerðu gæfumuninn en með þeim þótti sýnt að mennirnir, sem reistu búðirnar, höfðu einnig farið um svæði þar sem vínviður óx. 

Birgitta Wallace var meðal þeirra fornleifafræðinga sem rannsökuðu búðatóftirnar á Nýfundnalandi.Stöð 2/Friðrik Þór Halldórsson.
Meðal þeirra sem rannsökuðu staðinn var Svíinn Birgitta Wallace og hún telur að sjálfur Leifur Eiríksson hafi reist búðirnar. Hún telur fornleifarnar raunar staðfesta frásagnir Íslendingasagna. 

„Lýsingarnar í Vínlandssögum, einkum í Hauksbók, eru nákvæmlega það sem við höfum í L‘Anse aux Meadows,“ segir Birgitta Wallace.


Tengdar fréttir

Landnemarnir sigla áfram til Grænlands og Vínlands

Landnám Íslendinga á Grænlandi með siglingu Eiríks rauða árið 985 og dularfullt hvarf norrænu þjóðarinnar um 500 árum síðar er meðal þess fjallað verður um í þáttaröðinni "Landnemarnir“ sem heldur áfram á Stöð 2 í vetur.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.