Slasaðist illa á mjöðm eftir fall við Skálafellsjökul

Karlmaður slasaðist illa á mjöðm eftir að hafa fallið við Skálafellsjökul í dag. Þetta segir í tilkynningu frá Slysavarnfélaginu Landsbjörg en í kjölfar slyssins var óskað  eftir aðstoð þeirra. 

Maðurinn og samferðafólk hans hugðust ganga að jöklinum en skammt frá jökulröndinni varð manninum fótaskortur á votri klöpp í nokkrum hliðarhalla og rann hann niður hallann, tvo til þrjá metra. Gat maðurinn ekki gengið eftir fallið.

Lélegt farsímasamband er á svæðinu en manninum og þeim sem voru með í för tókst að senda staðsetningarhnit til björgunarfólks með textaskilaboðum sem varð til þess að björgunarsveitafólk frá Björgunarfélagi Hornarfjarðar fann manninn eftir stutta leit. 

Þyrla Landhelgisgæslunnar var síðan kölluð til í því skyni að aðstoða við leitina og eftir að maðurinn fannst var ákveðið að fá hana á staðinn til að flytja hann yfir á sjúkrahús. Meðan beðið var eftir þyrlunni hlúði björgunarsveitafólkið að manninum, kom honum fyrir á börum og undirbjó flutning hans með þyrlunni á sjúkrahús í Reykjavík.