Hrafnar hrella hreinláta Hafnfirðinga

Hrafnar gera nú hreinlátum Hafnfirðingum lífið leitt – þeir stunda það, einkum snemma að morgni dags þegar fáir eru að ferli, að róta í rusladöllum bæjarins og draga uppúr þeim draslið. Þegar svo Hafnfirðingar fara á kreik er sóðaskapurinn það sem við blasir.

Bæjaryfirvöld standa nánast ráðþrota gagnvart þessum vanda. Rósa Guðbjartsdóttir, formaður bæjarráðs í Hafnarfjarðarkaupstað, segir að þar sé mikið lagt uppúr því að hafa bæinn hreinan og snyrtilegan.

„Nú stendur yfir sérstakt hreinsunarátak í bænum þar sem bæjarbúar og forsvarsmenn fyrirtækja hafa verið ákaflega duglegir að hreinsa og snyrta í kringum sig, en hrafnarnir eru sumsé ekki að leggja sitt af mörkum, eru yfir þetta hafnir.“

Þó þetta sé hvimleitt er Rósa ekki alveg laus við að hafa húmor fyrir þessu. Hún segist ekki vita hvort þetta sé vandamál í öðrum bæjarfélögum eða hvort hrafnarnir í Hafnarfirði séu óvenju gáfaðir, eða jafnvel heimskir, eftir atvikum; að taka ekki virkan þátt í hreinsunarátakinu?

„Ég mætti til starfa snemma í morgun og þá var Haraldur bæjarstjóri L. Haraldsson að tína upp ruslið eftir hrafnana á Strandgötunni. Ég veit ekki hvort sé sérstakt hafnfirskt vandamál en krummarnir hér eru klókir að stinga sér ofan í ruslaföturnar. En í alvöru talað þá hef ég spurt út í það til umhverfis- og framkvæmdasviðs hvort einhvern tíma hafi komið til greina að skipta út ruslafötunum fyrir dalla sem ekki er svo auðvelt að rífa draslið upp úr. Þetta er ákaflega hvimleitt en mávar hafa líka sótt í dallana.“

Rósa segir það sannarlega svo að í mörg horn sé að líta í sveitarstjórnarmálunum.