Leikarar í útvarpsleikhúsinu hafa fengið sömu laun í tíu ár

Ekkert hefur þokast í launaviðræðum leikara við Ríkisútvarpið síðan upp úr slitnaði árið 2008. Viðræður eru hafnar að nýju en Félag íslenskra leikara er bjartsýnt á að í þetta sinn muni ganga betur. Sömu launatölur hafa gilt síðan árið 2005.

„Ég vakti athygli á þessu við útvarpsstjóra síðastliðið vor því mér fannst ekki ganga að það væru tíu ára gamlar launatölur. Hann var sammála því og vill laga það en það gengur hægt,“ segir Birna Hafstein, formaður FÍL.

Samkvæmt samningnum fær leikari sem les eina til fimmtíu línur og hefur tólf tíma viðveru við lestur sléttar tuttugu þúsund krónur fyrir vinnu sína, eða 120 krónur á hverja línu. Ef leikari hefur stærri rullu og les yfir þrjú hundruð orð fær hann greiddar hundrað krónur fyrir hverja línu, eða 25 þúsund krónur fyrir þrjátíu til 35 klukkustunda vinnu.

Ágreiningurinn snýst, samkvæmt heimildum Fréttablaðsins, um endur­flutning á efni en fyrir hann hefur RÚV hingað til ekki viljað greiða hátt verð. „Okkar tillögur voru þær að framreikna tölurnar frá 2005. Síðan er okkur ekkert til setunnar boðið að skoða samninginn í heild sinni og gera á honum breytingar. Það er ósk útvarpsins að fara í einhverskonar uppskurð á honum,“ segir Birna. Hún segir að FÍL geti hugsað sér það en í millitíðinni vilji félagið gera bráðabirgðasamning með hærri launatöflu.

„Það bara gengur ekki lengur að stofnun sem er rekin fyrir ríkisfé sé með tíu ára gamlar launatölur.“