Eigandi bíls sviðsetti innbrot til að svíkja út fé

Lögreglan á höfuðborgarsvæðinu hefur upplýst innbrot í bifreið í umdæminu á síðasta ári, en þar var stolið verkfærum að andvirði nokkurra milljóna króna.

Í tilkynningu á vef lögreglunnar kemur fram að tjónið hafi verið mjög bagalegt fyrir eiganda áhaldanna, hann var að sögn lögreglunnar ágætlega tryggður og fékk greitt frá sínu tryggingafélagi í samræmi við það.

Lögreglan hefur nú upplýst málið og endurheimt drjúgan hluta af verkfærunum en þjófurinn reyndist hins vegar vera eigandi þeirra eftir allt saman.

Sá sviðsetti innbrotið og kallaði síðan til lögreglu, en tilgangurinn var að svíkja út fé.