Brýnt sé að standa vörð um mannúð

Forseti Íslands, Ólafur Ragnar Grímsson, sendi í dag samúðarkveðjur frá sér og íslensku þjóðinni til Philippe, konungs Belgíu, vegna hryðjuverkaárásanna í Brussel í morgun.

Í tilkynningu frá forsetanum segir að „samúð Íslendinga sé með fjölskyldum þeirra sem biðu bana, ættingjum þeirra og vinum, sem og með þeim sem sárir eru. Hryðjuverkaárásirnar í dag séu atlaga að lýðræði okkar og siðmenningu, mannréttindum, jafnrétti og frjálsri umræðu.“

Þá segir jafnframt að brýnt sé að standa vörð um mannúð og bræðralag, lýðræði og jafnrétti sem skipa öndvegið í samfélagsskipan okkar, menningu og sögu.

Dagur B. Eggertsson, borgarstjóri, hefur jafnframt sent samúðarkveðjur til borgarstjóra Brussel, Yvan Mayeur, þar sem hann vottar honum samúð sína fyrir hönd Reykjavíkurbúa:

„Erfitt er að ímynda sér meiri óhugnað – en skipulagðar árásir sem beinast gegn saklausu fólki. Hugur okkar allra er hjá íbúum Brussel, fórnarlömbum árásarinnar, ættingjum þeirra og vinum.“

Staðfest er að 34 hafi látist í árásunum í dag og yfir 230 særst. Íslamska ríkið hefur lýst yfir ábyrgð á árásunum.