Ofur-Baldur ber helmingsábyrgð á móti Landsbjörg

Hæstiréttur dæmdi í dag Slysavarnafélagið Landsbjörg skaðabótaskylt að hluta gagnvart Baldri Sigurðssyni tónlistarmanni sem slasaðist illa á gamlárskvöld 2012 er hann fékk skoteld í höfuðið við að sprengja flugeldatertu.

Héraðsdómur Reykjavíkur hafði dæmt slysavarnafélagið til að bera 2/3 hluta líkamstjóns Baldurs á móti honum sjálfum en samkvæmt dómi Hæstaréttar bera aðilar málsins tjónið til helminga.

Baldur, eða Ofur-Baldur eins og hann er gjarnan kallaður, sagði sögu sína í sérstökum fréttatíma Stöðvar tvö árið 2013. Hann sagði það þar mildi að hann hafi notast við vélstjóragleraugu sín umrætt kvöld en höfuðkúpa hans brotnaði samt sem áður á þremur stöðum í slysinu og sjón hans tapaðist.

Í dómi Hæstaréttar kemur fram að allar leiðbeiningar á skottertunni hefðu samrýmst kröfum sem gerðar væru til leiðbeininga samkvæmt reglugerð um skotelda, fyrir utan það að ekki voru leiðbeiningar um að öryggisfjarlægð væri 25 metrar. Á þeim galla tertunnar bæri Landsbjörg ábyrgð.

Hins vegar verður það ráðið af framburði vitna í málinu að Baldur hafi ekki farið eftir þeim leiðbeiningum sem voru á tertunni og hann kvaðst hafa lesið áður en hann kveikti í.

Í dómi Hæstaréttar segir að leiðbeiningarnar hefðu átt að gefa honum tilefni til ríkrar aðgæslu, meðal annars að víkja vel frá tertunni, en þess í stað hafi hann staðið yfir henni og fært hana til eftir að hann kveikt í. Með því sýndi hann af sér stórkostlegt gáleysi að mati réttarins. Bótaábyrgð Landsbjargar var því viðurkennd til helminga við bótaábyrgð Baldurs sjálfs.

Dóm Hæstaréttar má sjá í heild sinni hér.