Eitt umferðaróhapp stöðvaði umferð á háannatíma í Reykjavík í gær

Mikill umferðarþungi hefur verið á höfuðborgarsvæðinu undanfarnar vikur þegar fólk er að fara í og úr vinnu. Lítið má út af bregða þegar þannig ástand er á helstu leiðum eins og sást síðdegis í gær þegar umferðaróhapp á Höfðabakka varð til þess að langar raðir mynduðust í Ártúnsbrekkunni sem náðu vestur eftir Miklubrautinni. Reyndu margir að finna sér leið fram hjá þeirri röð og urðu því langar raðir á á þeim leiðum einnig. Má segja að ástandið hafi verið hvað verst um á fimmta tímanum í gær og náði alveg fram á sjöunda tímann.

„Það fór bíll út af veginum við Höfðabakkabrúna. Það tók tíma að koma honum aftur inn á veginn sem varð til þess að það urðu umferðartafir,“ segir Kristján Ólafur Guðnason, aðstoðaryfirlögregluþjónn á höfuðborgarsvæðinu, um málið. Engin slys urðu á fólki en einnig varð minniháttar umferðaróhapp á sama tíma í Ártúnsbrekku þar sem ekið var aftan á bíl og tafðist umferð töluvert við það.

Ómar Smári Ármannsson, sem fer fyrir umferðardeild lögreglunnar á höfuðborgarsvæðinu, segir umferðina frekar þunga á þessum tíma árs. „Þetta byrjar korter í átta á morgnanna og til korter yfir níu. Svo byrjar þetta korter yfir fjögur síðdegis og til korter yfir sex. Það dregur síðan úr þessu um miðjan október. Þá fer fólk að velja annan tíma og aðrar leiðir til að fara á milli. Þá jafnast þetta út. Þetta er árlegur viðburður,“ segir Ómar Smári.

5. september síðastliðinn var fjallað um umferðarþungann á höfuðborgarsvæðinu í kvöldfréttum Stöðvar 2 en þar voru fengnar tölur frá Vegagerðinni sem sýndu að 6.839 óku vestur um Ártúnsbrekku á milli hálf átta til níu um morgun þann dag. Það eru 912 ökutækjum meira en óku um sama vegarkafla dagana 8. og 15. ágúst samanlagt, en þó óku 5.927 ökutæki þar um.

Guðbrandur Sigurðsson, hjá umferðardeild lögreglunnar á höfuðborgarsvæðinu, sagði að umferðarþunginn veki áhyggjur hjá viðbragðsaðilum sem þurfa að komast leiðar sinnar þegar þörf er á. Eins og staðan er núna geti það reynst erfitt.

Sérstaklega þar sem það geti tekið langan tíma að komast að Landspítalanum í Fossvogi og við Hringbraut.