Ítrekaði mikilvægi þess að virða sjálfstæði dómstóla

Lilja Alfreðsdóttir utanríkisráðherra ítrekaði mikilvægi þess að virða sjálfstæði dómstóla þegar hún fundaði með tyrkneskum starfsbróður sínum, Mevlüt Çavuşoğlu, í New York í dag.

Lilja er nú stödd í New York í tengslum við allsherjarþing Sameinuðu þjóðanna sem hófst formlega í dag.

Í tilkynningu frá utanríkisráðuneytinu segir að ráðherrarnir hafi átt hreinskiptar umræður um stöðu mála í Tyrklandi í kjölfar valdaránstilraunina í sumar. „Ég áréttaði fordæmingu okkar á valdaránstilrauninni sem beindist gegn lýðræðislega kjörnum stjórnvöldum og samúð með tyrknesku þjóðinni. Þá greindi ég utanríkisráðherranum jafnframt frá afstöðu okkar sem lúta að því að mannréttindi séu virt í hvívetna. Það var fróðlegt að heyra sjónarmið tyrkneskra stjórnvalda frá fyrstu hendi og við vorum sammála um mikilvægi þess að tyrknesk stjórnvöld vinni áfram náið með Evrópuráðinu og öðrum alþjóðastofnunum,“ er haft eftir Lilju, sem átti jafnframt stutt spjall við Recep Erdogan Tyrklandsforseta, þar sem sömu mál bar á góma.

Lilja sótti einnig ráðherrafund um flóttamannamál hjá Sameinuðu þjóðunum og í ræðu sinni og reifaði hún hvaða leiðir væru færar til að mæta þeim miklu áskorunum sem birtust í flóttamannavandanum víða um heim. Sagði ráðherra ábyrgð öryggisráðs Sameinuðu þjóðanna mikla og nauðsynlegt væri að koma í veg fyrir átök og finna friðsamlegar lausnir, meðal annars í Sýrlandi.

Ráðherrann lagði áherslu á mikilvægi þess að konur kæmu að friðarviðræðum og sáttaumleitunum og sagði að aukin aðkoma kvenna að friðarviðræðum auki bæði líkur á að friður náist og að hann haldist til lengri tíma litið.