Angelo ákærður fyrir innflutninginn

Hollendingurinn Angelo Uyleman hefur verið ákærður fyrir stórfellt fíkniefnalagabrot með því að hafa á síðasta ári staðið að innflutningi á fíkniefnum hingað til lands ásamt þremur öðrum karlmönnum. Fjórmenningarnir gætu átt yfir höfði sér allt að tólf ára fangelsi.

Angelo er greindarskertur og hefur mál hans því vakið nokkra athygli. Hann sat í einangrun á Litla-Hrauni í átta vikur en sú vist var harðlega gagnrýnd vegna andlegrar fötlunar hans. Þá hafði fjölskylda hans ekki verið látin vita af handtökunni fyrst um sinn og lét móðir hans því lýsa eftir honum á netinu.

Angelo var handtekinn ásamt öðrum manni sem einnig er hollenskur ríkisborgari. Sá er ákærður fyrir að hafa undirbúið og aðstoðað Angelo við innflutninginn. Hinir tveir ákærðu eru Íslendingar en þeir eru sakaðir um að hafa lagt á ráðin um innflutning og fjármagnað að hluta kaup fíkniefnanna.

Um er að ræða tæplega 20 kíló af amfetamíni og um 2,6 kíló af kókaíni sem flutt voru hingað til lands með Norrænu. Angelo er sagður hafa flutt fíkniefnin til Íslands frá Hollandi en þau voru falin í sérútbúnum geymsluhólfum undir framsætum og í miðjustokk bifreiðar sem hann ók til Danmerkur og þaðan með farþegaferjunni Norrænu. Sjá má atburðarásina, eins og henni er lýst í ákæru, hér fyrir neðan.

• Þriðjudagurinn 22. september: Angelo kemur til Íslands frá Danmörku með Norrænu. Hann keyrir frá Seyðisfirði til Hafnar í Hornafirði.
• Miðvikudagurinn 23. september: Angelo ekur bifreiðinni frá Höfn í Hornafirði til höfuðborgarsvæðisins
• Fimmtudagurinn 24. september: Angelo keyrir til Keflavíkur og að morgni næsta dags leggur hann bílnum í skammtímastæði við Keflavíkurflugvöll og heldur af landi brott.
• Mánudagurinn 28. september: Angelo kemur aftur til Íslands með flugi frá Amsterdam. Hann keyrir bílnum að bænum Stóra Knarrarnesi þar sem fyrirhugað var að fjarlægja fíkniefnin úr bifreiðinni. Þar eru Angelo og samlandi hans handteknir. Fíkniefnin fundust síðar við leit.
• Mánudagurinn 28. september: Annar Íslendingurinn er handtekinn skammt frá Stóra Knarrarnesi. Fyrirhugað var að hann tæki við fíkniefnunum.

Samlandi Angelo er sem fyrr segir ákærður fyrir að hafa undirbúið innflutninginn og aðstoðað Angelo fyrir báðar ferðirnar til Íslands í september í fyrra. Í ákærunni segir að hann hafi séð um að bóka gistingu að bænum Stóra Knarrarnesi og að þeir tveir hefðu mælt sér mót þar í þeim tilgangi að fjarlægja fíkniefnin úr bifreiðinni. Hafi hann svo ætlað að koma fíkniefnunum áleiðis til annars Íslendingsins svo hægt yrði að koma þeim í söludreifingu.

Þá eru Íslendingarnir tveir ákærðir fyrir að hafa lagt á ráðin um innflutning og fjármagnað að hluta kaup á fyrrgreindum fíkniefnum og kostnað við innflutning þeirra. Í ákærunni segir að kaupin hafi verið fjármögnuð með greiðslum þeirra inn á þrjátíu i-kort, rúmlega níu milljónum króna. Annar Íslendingurinn var handtekinn sama dag og Hollendingarnir, en þá var hann staddur skammt frá Stóra-Knarrarnesi. Fyrirhugað var að hann tæki við fíkniefnunum við Bláa lónið í Grindavík, að því er segir í ákærunni.

Ákæra var gefin út í vikunni og Hæstiréttur úrskurðaði á fimmtudag að Angelo skuli sæta farbanni þar til dómur fellur í málinu.