Aðstoða við flóknar dvalarleyfisumsóknir

„Þetta getur verið flókið kerfi,“ segir Erna Kristín Blöndal, framkvæmdastjóri hins nýstofnaða fyrirtækis WorkIs. Fyrirtækið sérhæfir sig í að aðstoða fyrirtæki við að fá dvalar- og atvinnuleyfi á Íslandi fyrir starfsfólk utan Evrópska efnahagssvæðisins.

„Við erum að reyna að gera það einfaldara fyrir íslensk fyrirtæki að fá erlent starfsfólk til landsins,“ segir Erna.

„Fyrir þá sem þekkja ekki til, vita ekki hvaða gögnum þarfa að skila inn, þá getur þetta verið flókið og tekið langan tíma þó að stjórnvöld geri sitt besta.“

Fyrirtækið hóf starfsemi í byrjun árs og segir Erna það hafa komið á óvart hve mikil þörfin sé, sérstaklega fyrir dvalarleyfi fyrir sérfræðinga. „Mjög flottir sérfræðingar eru kannski vanir öðru viðmóti gagnvart sér, að þeir fái hundrað prósent þjónustu og þurfi ekkert að koma að þessu.“

Erna segir mikilvægt fyrir íslenskan vinnumarkað að umhverfið sé aðlaðandi. Ísland sé eina norræna ríkið sem ekki hafi innleitt löggjöf sem ætlað sé að bæta umgjörð fyrir erlent starfsfólk. „Núgildandi löggjöf og stofnanaumhverfi er of flókið og óskilvirkt. Á sama tíma er skattaumhverfi óhagstæðara hér á landi en víða annars staðar og gjaldeyrishöft gera útlendingum sem hyggjast flytja hingað til lands erfitt fyrir,“ segir Erna. Einn liður í að einfalda kerfið geti verið þjónusta á borð við þá sem WorkIs bjóði upp á.

Þá sé mikilvægt að umsókn sé fullnægjandi í fyrstu atrennu. „Annars getur allt farið á byrjunarreit aftur og bæst við margar vikur ef ekki mánuðir við umsóknarferlið.“ Hún bendir á að til að mynda þurfi að skila sakavottorði frá öllum löndum sem starfsfólk hafi starfað í, sem í sumum tilfellum geti verið nokkuð mörg. „Þó öll gögn liggi fyrir getur það samt tekið tólf vikur að bíða eftir sakavottorði.“

Erna bendir á að um þrenns konar dvalarleyfi sé að ræða: Fyrir sérfræðinga, fyrir íþróttafólk og dvalarleyfi vegna skorts á vinnuafli. Í síðastnefnda tilfellinu þurfi að sýna fram á að skortur sé á starfsfólki á íslenskum vinnumarkaði og á Evrópska efnahagssvæðinu áður en dvalarleyfi sé veitt.

„Íslensk fyrirtæki eru farin að finna meira og meira fyrir skorti á starfsfólki,“ segir Erna. Atvinnuleysi var 2,9 prósent í febrúar samkvæmt tölum frá Vinnumálastofnun og hefur ekki verið minna á þessum árstíma frá því fyrir hrun. „Það er mjög mikilvægt fyrir fyrirtæki að fá starfsmenn hratt og örugglega, tíminn getur skipt mjög miklu máli.“