Kolrangstæðir í stórsókninni

Í fjárhagsáætlun 2016 gerði meirihlutinn í Reykjavík algjörlega óraunhæfar hagræðingarkröfur til leikskóla, grunnskóla og frístundaheimila. Með tillögum um viðbótarframlög viðurkennir meirihlutinn loks að skólakerfið sé gróflega undirfjármagnað.

Þetta kemur fram í bókun fulltrúa Sjálfstæðisflokksins í borginni vegna aðgerðaáætlunar sem meirihlutinn boðaði í fyrradag.

Kjartan Magnússon, borgarfulltrúi Sjálfstæðisflokksins, bendir á að tvískinnungur sé að halda því fram að um ný framlög til skólamála sé að ræða.

„Að langstærstum hluta er verið að viðurkenna þann hallarekstur sem er orðinn að veruleika vegna óraunhæfrar fjárhagsáætlunar og borgin hefur engin tök á að víkja sér undan,“ segir hann og ber þetta saman við rekstur ríkis á hjúkrunarheimili.

„Ef hjúkrunarheimili færi hund­rað milljónir fram úr fjárhagsáætlun og fjármálaráðherra þyrfti að mæta hallanum með aukafjárlögum þá væri stórundarlegt að blásið yrði til fundar og tilkynnt að það væri verið að hefja stórsókn í öldrunarmálum.“

Tilkynnt var af meirihlutanum að 919 milljóna króna framlag rynni til skólamála strax í haust. „Mér telst til að 835 milljónir af því fari í að bregðast við þessum hallarekstri og 25 milljónir fari í að fullnægja kjarasamningsbundnum skyldum borgarinnar um undirbúningstíma í leikskólum. Aðeins 67 milljónir af heildarsummunni eru raunveruleg viðbót,“ segir hann en þar er um að ræða 60 milljónir sem veittar eru til faglegrar stjórnunar í grunnskólum og 6,9 milljónir sem fara í námsgagnakaup.

Kjartan segir að stjórnendur skóla og borgarfulltrúar Sjálfstæðis­flokksins hafi bent á óraunhæfa fjárhagsáætlun margsinnis síðustu mánuði en viðbrögðin hafi látið á sér standa. 

Búið að fara fyrstu tröppuna

Leikskólastjórar sendu frá sér ályktun eftir kynningu á nýju aðgerðaáætluninni. Þar er lýst yfir ánægju en einnig bent á að þetta séu fyrstu skrefin og margt þurfi enn að skoða og bæta í starfs­umhverfi leikskóla.

„Það þarf til dæmis viðhald á búnaði, húsnæði og lóðum,“ segir Anna Margrét Ólafsdóttir, leikskólastjóri á Nóaborg. „Fjársvelti síðustu ára er farið að taka sinn toll þar.“

Anna Margrét bendir einnig á að ekki sé gert ráð fyrir að starfsfólk borði með börnunum í framlagi til fæðis, ekki sé hægt að borga yfirvinnu og huga þurfi að námsleyfum starfsfólks.

„En það er stór blýklumpur farinn af öxlinni, ég fór í morgun og keypti köku til að fagna þessari áætlun. Það er búið að spyrna frá botninum og ég ætla að trúa því að þetta sé eingöngu fyrsta skrefið.“

Ólafur Brynjar Bjarkason, leikskólastjóri í Hagaborg og Mýri, segir bjartsýni í hópi leikskólastjóra. „En það þarf að skoða endurnýjun í stéttinni alvarlega og gera leikskólastarfið samkeppnishæft á vinnumarkaði. Það kostar peninga.“

Fréttin birtist fyrst í Fréttablaðinu